Qytaida ótip jatqan «Singer-2017» án baiqaýynyń kelesi kezeńinde álemdi aýzyna qaratqan otandasymyz Dimash Qudaibergen halyq áni «Daididaý» ánin oryndaidy. Bul týraly Mádeniet jáne sport ministri Arystanbek Muhamediuly málim etti, dep habarlaidy "Ult aqparat".
«Dostar, jaqsy jańalyq! Dimash Qudaibergen Qytaida ótip jatqan «Singer-2017» konkýrsynda Qazaq ulttyq óner ýniversitetiniń halyq aspaptar ansambliniń súiemeldeýimen «Daididaý» ánin oryndaidy», - dep habarlady ministr Feisbýk áleýmettik jelisindegi paraqshasynda.
Muhamediulynyń aitýynsha, Mádeniet jáne sport ministriniń muryndyq bolýymen halyq aspaptar ansambli Qytaiǵa baryp, konkýrsqa daiyndalyp jatyr.
«Aita keteiin degenim, Dimashtyń birge oqyǵan qatarlas dostary qýana-qýana Qytaiǵa ketti jáne Dimashpen birge tamasha óner kórsetpek. Qyz-jigitter konkýrsqa arnap tigilgen ulttyq kiimderdi kiip shyǵady», - dep habarlady ministr.
Aita keteiik, Dimash Qudaibergen «Slavian bazary» halyqaralyq án jarysynda osy «Daididaý» ánin oryndap, Gran-Pridi ielengen bolatyn.
