13 qyrkúiek kúni «Astana Opera» teatrynda Álemdik jáne dástúrli dinder liderleri seziniń delegattary men qatysýshylaryna arnalǵan kontsert ótti, dep habarlaidy QazAqparat.
Álemdik jáne dástúrli dinder liderleri VII seziniń resmi ókili Nazym Janǵazinovanyń aitýynsha, bir sahnada esimi álemge áigili óner maitalmandary jinaldy.
Olardyń arasynda Dimash Qudaibergen, Qazaqstannyń eńbek sińirgen qairatkerleri Azamat Jaltyrgózov, Bibigúl Januzaq, Nurbolat Arzamas, Jámilá Jarqymbaeva, halyqaralyq baiqaýlardyń laýreaty Jaqsykeldi Maiasarov, P.I.Chaikovskii halyqaralyq baiqaýynyń laýreaty Aqbike Alǵi bar. Sondai-aq sharaǵa «Astana Opera» teatrynyń hory, balet trýppasy men simfoniialyq orkestri, dombyrashylar ansambli, Memlekettik respýblikalyq akademiialyq korei teatrynyń bi toby, «Astana Opera» balalar hory, «Astana balet» teatry, «Astana sazy» ansambli jáne basqa da birqatar bi ujymdary qatysty.
Dimash Qudaibergen kórermenge jańa singlin usyndy. Buǵan deiin habarlaǵanymyzdai, «The story of one sky» («Bir aspannyń hikaiasy») áni adamdardy tatýlyqqa úndeidi. Ánshi násilge, ultqa, dinge bólingen halyqtyń bári bir planetanyń perzenti jáne bir aspan astynda ómir súrip jatqanyn aitady.
«Dimash bul shyǵarmany jazýdy 3 jyl buryn bastaǵan bolatyn. Ulym kompozitsiiaǵa barynsha jaýapkershilikpen qarady, bar yntasyn saldy. Jańa týyndynyń mýzykasynyń avtory da ózi. Alǵashynda izgilik pen tatýlyqty tyńdarman boiyna sińiretin jyr jazý, halyq birligin kórsetý kerek degen oi ǵana boldy», – dep atap ótti mýzykanttyń ákesi Qanat Aitbaev jańa án týraly.
