Belarýs astanasynda II Eýropa oiyndarynyń ashylý rásimi ótip jatyr. Saltanatty sharaǵa álemge tanymal qazaqstandyq ánshi Dimash Qudaibergen qatysýda, dep habarlaidy QazAqparat.
Ashylý saltanatyn Belarus-1 jáne Belarus-5 telearnalary tikelei kórsetýde. BELTA agenttiginiń habarlaýynsha, saltanatty shara ótip jatqan «Dinamo» stadionynda 20 myńnan astam jankúier jinalǵan.
Aita ketken jón, II Eýropa oiyndarynyń ashylý saltanatyndaǵyprodiýser - kompozitor Igor Krýtoi, rejisser-postanovshik - Aleksei Sechenov. Sondai-aq osynaý asa aýqymdy mádeni-sporttyq shoýda álemge tanymal operalyq ánshi Anna Netrebko, sondai-aq Qazaqstannan ánshi Dimash Qudaibergen án shyrqaityn bolady.
II Eýropalyq oiyndardyń ashylýyna bir kún qalǵanda Dimash Instagram-daǵy akkaýntynda Minsk áýejaiynda ózin qarsy alǵan jankúierlerimen birge túsken sýretin jariialaǵan bolatyn.
Belarýs elindegi Ekinshi Eýropalyq Oiyndardyń saltanatty ashylýynda Dimash Qudaibergen jańa italiialyq ándi oryndaidy dep málim etti áleýmettik jelide onyń shet elderdegi jankúierleri.
Aita ketsek, II Eýrpalyq oiyn Minskide 21-30 maýsym aralyǵynda ótedi. Asa aýqymdy sporttyq forýmǵa 50 elden 4 myńnan astam atlet qatysady.
Sport alańdaryndaǵy tartysty básekeni tek Eýropa ǵana emes, Aziia, Afrika, Soltústik jáne Ońtústik Amerika elderiniń de jankúierleri kóretin bolady. Jarys sporttyń 15 túrinen uiymdastyrylady jáne ony 500 million telekórermen tamashalaityn bolady.
Aita ketken jón, Eýropalyq oiyndar alǵash ret 2015 jyly Ázerbaijan astanasy Bakýde ótken bolatyn.
