Dimash Qudaibergen biylǵy Junior Eurovision baiqaýynda Qazaqstan namysyn qorǵaityn 12 jasar ánshi Qaraqat Bashanovamen kezdesti, dep habarlaidy Dimashnews resýrsy.
Eske sala keteiik, biz buǵan deiin Qaraqat Bashanovanyń Junior Eurovision baiqaýyna qatysatynyn jazǵan bolatynbyz.
Halyqaralyq án saiysy 29 qarasha, senbi kúni Varshavada ótedi. Pandemiiaǵa bailanysty tikelei efir kezinde shoý júrgizýshileri Polshada bolady. Al qatysýshylar óz elderinen nómirlerdi beinebailanys arqyly usynady dep sheshilgen.
Jaýapty syn aldynda Qaraqat iri halyqaralyq baiqaýlardyń jeńimpazy, tájiribeli ánshi Dimash Qudaibergenovpen kezdesti.
Jas ónerpazben álemge áigili ánshi 2019 jyldan beri tanys. Ol kezde Dimashtyń týǵan qalasy Aqtóbede Baqytty Bala baiqaýy ótip, Qaraqat úshinshi oryn ielengen bolatyn.
Búgingi kezdesý Nur-Sultandaǵy ortalyq kontsert zalynda boldy. Dimash Qaraqatqa qoldaý bildirip, ákesine arnalǵan «Forever» ánin tamashalady.
«Seniń boiyńdaǵy talant meni tebirentti. Ol mindetti túrde basqalardy da tań qaldyratynyna senimdimin» , – dep jigerlendire tústi.
Dimash óz tájiribesin bólisip, keńes berdi. Nomerdi oryndaýda vokaldan bólek sahnalyq sheberlik qajet.
«Jeńiske jetý úshin jaqsy kóńil-kúi de mańyzdy» - dep aqylyn aitty.
Qaraqat mańyzdy syn aldynda Dimashtyń ózi daiyndyqqa kelip, qatysqanyna qatty qýandy.
Kezdesýden shabyt alǵan ónerpaz súiikti ánshisine qoldaý bildirgeni úshin alǵys aityp, laiyqty óner kórsetýge kúsh salatynyn jetkizdi.
Qaraqatqa Dimashtyń qaryndasy Raýshan da sáttilik tiledi. Jas ónerpazǵa balalar Evrovedeniesine qatysýǵa Raýshan usynys aitqan bolatyn.
Esterińizge sala keteiik, Qaraqat - Junior Eurovision baiqaýyna Qazaqstan atynan qatysyp otyrǵan úshinshi ónerpaz. Buǵan deiin Daneliia Tóleshova (2018 jyly) baq synap, altynshy orynǵa ie boldy. Ótken jyly bul konkýrstyń ekinshi ornyn Erjan Maksim jeńip aldy.
