Almaty qalasynyń Politsiia departamenti ultaralyq arazdyqty qozdyrǵan 29 jastaǵy azamatqa qatysty qylmystyq tergeýdi bastady, dep habarlaidy QazAqparat tilshisi.
Almaty turǵyny Instagram jelisi arqyly sanaly túrde ultaralyq jáne dini sipattaǵy alaýyzdyq týdyratyn áreketterge barǵan.
«Ol ótken jyldyń kúzinde Instagram jelisinde azamatsha D.Ahmadievanyń paraqshasynda óz loginimen óreskel pikirler qaldyrǵan. Osylaisha, buǵan deiin de qaraqshylyq boiynsha sotty bolǵan jigit áleýmettik jeli arqyly ulttyq jáne dini sipattaǵy alaýyzdyq týdyrǵan. Kelip túsken aryzdar boiynsha politsiia QR QK-niń 174-baby boiynsha sotqa deiingi tergeý sharalaryn júrgizdi. Jedel-izdestirý sharalary barysynda alaýyzdyqty nasihattaýshynyń kim ekeni anyqtaldy. Sot saraptamasy jaýapkerdiń jelide qaldyrǵan pikirlerinde ulttardyń ar-namysyna tietin sózder bolǵanyn rastady. Ol óz kinásin moiyndap, keshirim surady» - delingen departamenttiń Facebook jelisindegi resmi paraqshasynda.
Politsiia áleýmettik jeli qoldanýshylaryn ózgelerdiń jeke basyna til tigizip, ulty men dini senimin qorlaýdan saq bolýǵa shaqyrady. Sebebi ol úshin qylmystyq jaýapkershilik qarastyrylǵan.
