Tegeranda sý tapshylyǵy men ekonomikalyq jaǵdaidyń nasharlaýyna narazy azamattar kóshege shyǵyp, "Diktatorǵa ólim!" dep aiqailap, memleket basyndaǵy dindar saiasatkerlerge narazylyq bildirdi.
Azattyqtyń Iran qyzmeti – Farda radiosy áleýmettik jelide jariialanǵan videolar men jazbalarǵa silteme jasai otyryp, narazylyqtyń 26 shilde tańerteń Tegeran ortalyǵyndaǵy Djomhýri Islami dańǵylynda bolǵanyn habarlady, dep jazady Azattyq radiosy.
Demonstranttar Hýzestan men Irannyń ózge de qalalarynda 15 shildeden beri jalǵasyp jatqan sý tapshylyǵyna qarsy narazylyqqa shyqqandarǵa qoldaý bildirgen.
Tegerannan túsirilgen videolardyń birinde narazylar memleketti basqaryp otyrǵan konservatistik islamshyl saiasatkerlerdi synap, "zeńbirekter, tankiler, tútin qutylar, moldalar ketýi tiis!" dep aiqailaidy. Taǵy bir videoda jastar "Hameneige masqara!", "Ketsin!" dep aiqailaidy. Bul tusta jastar Irannyń rýhani kósemi aiatolla Áli Hameneidi meńzep otyr.
Iranda sońǵy 50 jylda bolmaǵan qýańshylyq máselesin sýdy tiimsiz basqarý saiasaty onan saiyn ýshyqtyryp jibergen. Buǵan deiin sý elektr stantsiialary isten shyǵyp, Irannyń birqatar aýmaqtary jaryqsyz qalǵan.
15 shildeden beri keminde bes demonstrant politsiia qolynan qaza bolǵan.
