Kollaj: ulysmedia.kz
Búgin Parlament Senaty qańtar oqiǵasyna qatysqandarǵa bir rettik raqymshylyq jariialaý týraly zań qabyldady. Qabyldanǵan qujatqa sáikes, qatysýshylardyń bir bóligi bosatylsa, basqalarynyń jaza merzimi qysqartylady.
Osyǵan orai Bas prokýrordyń orynbasary Áset Shyńdaliev "Dikii Arman" laqap atymen tanymal Arman Jumageldiev pen Almaty qalasy máslihatynyń eks-depýtaty Qairat Qudaibergen raqymshylyqqa ilige me degen suraqqa jaýap berdi, dep habarlaidy "Ult aqparat".
Shyndalievtiń aitýynsha, qazirgi kezde 20 adamǵa qatysty tártipsizdikterdi uiymdastyrý boiynsha qylmystyq is qozǵalǵan. Ondai ister raqymshylyqqa ilikpeidi.
"Uiymdastyrýshylar raqymshylyqqa ilinbeidi. Qańtar oqiǵasyna qatysýshylarǵa ǵana amnistiia jasalady. Al Qairat Qudaibergen men Arman Jumageldiev tártipsizdikterdi uiymdastyrýshylar qataryna kiredi", - dedi Shyndaliev jýrnalisterge bergen suhbatynda.
Onyń sózinshe, qańtar oqiǵasy kezinde qylmys jasaǵandardyń kóbine qatysýshy degen aiyp taǵylǵan, bul - shamamen 700 adam.
Aita keteri, búgin Senat raqymshylyq týraly zań qabyldady. Oǵan sáikes, teris qylyq, aýyrlyǵy tómen jáne ortasha qylmys jasaǵandar jazadan tolyq bosatylady. Al jazasyn ótep shyqqandardan sottylyq alynady. Budan bólek, aýyr jáne asa aýyr qylmystardy jasaǵandarǵa jaza merzimin qysqartý kózdelgen. Atap aitqanda, aýyr qylmystar úshin sot taǵaiyndaǵan merzimniń tórtten úsh bóligi, al asa aýyr qylmystar úshin jazanyń jartysy qysqarady.
Eger sottalǵan tulǵanyń jazany óteý merzimi bir jyldan az bolsa, onda ol tolyq bosatylady. Jalpy raqymshylyq 1500-dei adamdy qamtidy. Al terrorister, ekstremister, retsidivister, adamdy azaptaǵandar, tártipsizdikterdi uiymdastyrýshylar men memleketke opasyzdyq jasaǵandar raqymshylyqqa ilinbeidi.
Eske salaiyq, eks-depýtat Qairat Qudaibergen qańtar oqiǵasy boiynsha 22 sáýirde ustalǵan bolatyn. Ol bir aiǵa qamaýǵa alyndy, sodan keiin qamaý merzimi 21 maýsymǵa deiin, odan keiin taǵy úsh aiǵa uzartyldy.
Prokýrorlardyń aitýynsha, Qudaibergen jappai tártipsizdikti uiymdastyrdy jáne oǵan qatysty degen kúdikke ilingen. Aldyn ala tergeý barysynda Qairat Qudaibergen Arman Jumageldievpen (Dikii Arman - esk.) "Qazaqstan" qonaqúiinde adamdardy jinaýdy uiymdastyryp, Jumageldievtiń ainalasyna birigýge, ony qoldaýǵa jáne bilikke biryńǵai talap qoiýǵa shaqyrǵany, sondai-aq adamdardy 10 adamnan bólip, olardy toptastyrýdyń airyqsha belgisi retinde qolyna aq tústi tańǵyshtardy bailaýdy tapsyrǵany anyqtaldy.
