Elordada Digital Bridge halyqaralyq tehnologiialyq forýmynda UMAY Angels Club basshysy Mirat Ahmetsadyqov jas startaperlerdi áleýetti investorlarmen kezdesýlerdi belsendi túrde ótkizýge shaqyrdy, dep habarlaidy QazAqparat.
«Bir nemese bir jarym jyl ishinde jobalardy jasap jatqandar bar. Forým aiasynda keshe osyndai mamandardan qarajatty qansha ýaqyt izdegenin, investorlarmen qansha kezdesý ótkizgenin suradym. Olardyń biri investorlarmen 6-7 kezdesý ótkizse, ekinshisi 10 kezdesýge barǵanyn aitty. Biz osy jylda 225 kezdesý uiymdastyrdyq. Bul turǵyda kez kelgen startaptan ozyp shyqtyq», - dedi M. Ahmetsadyqov.
Onyń paiymynsha, ideiasyn iske asyrǵysy keletin jastar barshylyq, biraq olar investorlarmen kezdesýde belsendi emes.
«Naryqta qarajat jetkilikti. Degenmen olar investorlar joq ekenin aityp, negizsiz syltaý aitady. Startapta eshqandai jumys júrmei jatyr. Jarty jylda 10 kezdesý degen óte az ǵoi, qarym-qatynas belsendi bolý kerek», - dedi Mirat Ahmetsadyqov.
Buryn habarlanǵandai, elordada úshinshi ret Digital Bridge halyqaralyq tehnologiialyq forýmy 28-29 qazan aralyǵynda ótip jatyr.
Biylǵy forýmnyń taqyryby - Digital Era Lifestyle. QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin «Tsifrlandyrý, innovatsiia jáne ǵylym arqyly tehnologiialyq serpilis» ulttyq jobasyn usyndy.
Forýmnyń iskerlik baǵdarlamasy 20 paneldik sessiiadan turady, onda 70 -ten astam spiker - halyqaralyq jáne qazaqstandyq IT -qaýymdastyqtardyń ókilderi sóz sóileidi. Elimizde úshinshi ret ótip jatqan Digital Bridge alańynda ádettegidei Astana Hub Battle jarysynda tehnologiialyq startaptar baq synasyp, eń myqty IT-kompaniialar Astana Hub Awards premiiasy aiasynda marapattalady. Biyl pandemiia talaptaryna orai is-sharalar gibrid formatta ótedi – birqatar resmi sharalar offlain ótse, forýmnyń negizgi bóligi onlain nusqada kórsetilip, kez-kelgen adam qatysa alady.
