Koronavirýs tabylyp, Japoniia jaǵalaýynda karantinge turyp qalǵan Diamond Princess kemesindegi Qyrǵyzstan azamatyna koronavirýs juqqany anyqtaldy. 28 aqpanda Bishkekte baspasóz jiynyn ótkizgen Qyrǵyzstannyń syrtqy ister ministriniń orynbasary Nýrlan Abdrahmanov osylai dep aitty. Qyrǵyzstan azamatynyń virýs juqtyrǵanyn 26 aqpanda tapsyrǵan saraptama qorytyndysy kórsetken.
Ministrlik ókiliniń aitýynsha, qyrǵyz azamaty Japoniiadaǵy aýrýhanalardyń birinde ońasha palatada em qabyldap jatyr. Qyrǵyzstannyń Japoniiadaǵy elshiligi qyrǵyz azamatymen turaqty túrde habarlasyp, jaǵdaiyn baqylap otyr.
Japoniia jaǵalaýynda turǵan Diamond Princess lainerinde 5 aqpanda bir adamnan koronavirýs tabylyp, karantinge jabylǵan. Keme ishinde 50 elden 3700 adam bolǵan. Lainerde 500-den astam adam virýs juqtyrǵan.
Buǵan deiin Qazaqstan syrtqy ister ministrligi karantindegi Diamond Princess kemesinde bolǵan Qazaqstannyń tórt azamaty: eki áiel eki nemeresimen 21 aqpanda jaǵaǵa shyqqanyn, olarǵa virýs juqpaǵanyn habarlaǵan bolatyn. Olar osy apta basynda Qazaqstanǵa oralǵan. Densaýlyq saqtaý ministrliginiń aitýynsha, olar 14 kúndik karantinge jiberilgen.
Sońǵy derekke sáikes, álem boiynsha 80 myńnan astam adamǵa koronavirýs juqqan. Shamamen 2800 adam virýstan kóz jumǵan. Olardyń basym bóligi - Qytaidyń Hýbei provintsiiasynyń turǵyndary.
