Nur-Sultan qalasynyń ákimi Altai Kólginovtiń aitýynsha, búginge deiin elordada 1900 podezde dezinfektsiialaý jumysy júrgizilgen, dep habarlaidy QazAqparat.
«Qaladaǵy dezinfektsiia aitarlyqtai kúrdeli jumys. Bul iske Qarýly kúshterdiń áskerileri de aralasty. Dál qazirgi ýaqytta qalany dezinfektsiialaý jumysyna 475 adam atsalysýda. Jartysy – áskeriler. Qalǵany bizdiń mamandar men dezinfektsiiamen ainalysatyn arnaiy kompaniianyń ókilderi. Eń birinshi kezekte biz infektsiia oshaqtaryn óńdeimiz. Máselen qazirgi tańda shaharda 10 uiym karantige jabylǵan. Onyń ishinde №1 avtobýs parki de baryn bilesizder. Sonymen qatar karantinge jabylǵan nysandardyń ishinde jataqhanalar, eki meditsinalyq uiym bar. Biz eń birinshi kezekte koronavirýs anyqtalǵan adamnyń úiindegi podezdi tazaladyq», - dedi Altai Kólginov Tengriniýs.kz portalyna bergen tikelei efirdegi suhbatynda.
Qala basshysy, sonymen qatar, dezinfektsiialaý jumysy aialdamalarda, jaiaý júrginshiler jolynda júrgizilip jatqanyn aityp ótti.
«Qazir biz negizinen podezderge basa mańyz berip otyrmyz. Ne úshin bul kúrdeli jumys dep aityp otyrmyn. Máselen dezinfektsiialaýshy bir adamnyń arqasynda 10 kelilik júkpen kúni boiy jumys isteidi. Búgin tańerteńge deiin biz 1900 podezdi dezinfektsiialadyq. Bul – 500-ge tarta úi», - dedi ol.
Onyń aitýynsha kóshe men aýlada adam qanshalyq az bolsa, koronavirýstyń taralý qaýpi sonshalyqty tómen.
«Bul preparattar adamdardyń ómirine qaýipti bolsa, paidalanbas edik. Biraq bul preparat – antivirýs. Sol sebepti ol shashylyp jatqan kezde aýlaq bolý kerek. Jalpy, qaýipsiz degenimizben quramynda hlor bar. Bul máselege de barlyq qaýipsizdik normasyn saqtai otyryp qaraý kerek. Sol sebepti podezderdi óńdeý kezinde qala turǵyndaryna shyqpaýdy suraimyz», - dedi ol.
