Deutsche Bank AG Soltústik jáne Shyǵys Eýropa boiynsha aimaqtyq keńsesiniń bas atqarýshy direktory Iorg Bongartts Qazaqstanǵa jasyl obligatsiialar men qarjy quraldaryn shyǵarýdy usyndy, dep habarlaidy QazAqparat.
«Sońǵy jyldar ishinde Qazaqstan ESG (ekologiialy-áleýmettik-korporatvitik damý) qaǵidattaryna sáikes keletin halyqaralyq retteýdi engizý úshin óte jaqsy negiz qura aldy. Endi memleket pen qazaqstandyq korporatsiialar muny halyqaralyq kapital tartý kezinde básekelestik basymdyq retinde paidalana alady. Búgingi tańda biz Qazaqstan Úkimeti men kompaniialaryna ESG-men bailanysty jasyl obligatsiialar men qarjy quraldaryn shyǵarýdy jáne osy kapitaldy shikizattyq emes sektordy yntalandyrý men damytý úshin paidalanýdy usynamyz», - dedi Iorg Bongartts.
Ol, sondai-aq, Qazaqstanǵa Astana halyqaralyq qarjy ortalyǵy arqyly jergilikti jobalarǵa ESG talaptaryna jaýap beretin investitsiialar tartýǵa bolatynyn atap ótti.
«Doiche Bank» ESG portfelin 2023 jylǵa deiin 200 milliard eýroǵa ósirýge mindetteme aldy. Biz ESG standarttaryna sáikes keletin jáne shikizattyq emes ekonomikany qoldaýǵa arnalǵan qazaqstandyq jobalardyń osy mindettemelerge kirýin asyǵa kútemiz», - dedi Deutsche Bank basshysy.
