QR Parlamenti Májilisiniń depýtattary «Jyljymaityn múlik registri» derekter qorynda turǵyndarǵa emin-erkin qoljetimdikti qamtamasyz etýdi usyndy, dep habarlaidy QazAqparat.
«Quqyqtyq kadastrge qoljetimdiktiń shekteýli bolýy jyljymaityn múlikti tirkeýdegi kemshilikterge jatqyzylýda. Bul óz kezeginde bankterdiń, rieltorlardyń, qurylys kompaniialarynyń, sondai-aq azamattyq sharttar jasaý kezinde turǵyndardyń da jumysyn qiyndatady», - dedi Májilis tóraǵasynyń orynbasary Vladimir Bojko Úkimet saǵaty barysynda.
Onyń sózine qaraǵanda, Grýziia, Resei jáne AQSh-ta árbir adam jyljymaityn múlik tirkeliminen málimetterdi esh kedergisiz alýǵa qaýqarly. Bul rette, osy normany elimizde engizilýin halyqaralyq sarapshylar da usynyp otyr.
«Bizde bul baǵytta qarsylyq bildiretinder bar ekendigi túsinikti. Keibir azamattar ózderiniń atyna qandai múlik tirkelgenin basqalary kórmegenin qalaidy. Meniń oiymsha, bizde osyǵan deiin aýqymdy zańdastyrý sharalary ótkendikten, bul máselede múlikti jasyrýdyń reti joq. Sondyqtan bul jaǵdai zańmen qarastyrylǵanyn ári aiqyndalǵanyn túsiný kerek», - dedi ol.
Óz kezeginde áriptesine depýtat Nurlan Ábdirov te qoldaý bildirip, jyljymaityn múlik nysandary týraly derekterdiń qoljetimdi bolýy mańyzdy ekenin atap ótti.
N. Ábdirovtyń aitýynsha, «Doing Business» reitinginde «Menshikti tirkeý» indikatory boiynsha joǵary pozitsiiadaǵy elderde osyndai aqparatty úshinshi adamdar erkin kóre alady.
