Búgin Ońtústik Qazaqstan oblysynyń ákimi Janseiit Túimebaev oblystyq máslihattyń kezekti XIV sessiiasynda biylǵy jyldyń 7 aiynda atqarylǵan jumystar boiynsha esep berdi.
Onda eń aldymen 2017 jyldyń qańtar-shilde ailarynda atqarylǵan jumystar boiynsha 15 minýttyq video rolik kórsetilip, barlyq depýtattarǵa oblystyń áleýmettik-ekonomikalyq damýy jaiy baiandalǵan kitapsha úlestirildi.
2017 jyldyń 7 aiynyń qorytyndysymen oblysta mańyzdy áleýmettik-ekonomikalyq kórsetkishterdiń ósimi saqtalǵan. Máselen, osy ýaqyt ishinde oblysta 439,1 mlrd. teńgeniń ónerkásip ónimi óndirilip, ótken jyldyń sáikes kezeńimen salystyrǵanda 0,3 paiyzǵa ósken. Al, ónerkásip salasyndaǵy óńdeý ónerkásibi 301,3 mlrd. teńgeni qurap, 34,6 mlrd. teńgege artqan.
Baiandamada kórsetilgendei osy jyly negizgi kapitalǵa 229,9 mlrd. teńge investitsiia tartylyp, bul respýblikadaǵy úlesiniń 5,7 % quraǵan. Óńirge kóptep investitsiia tartý maqsatynda jyl basynan beri shetel investorlarymen 40-tan asa iskerlik kezdesýler uiymdastyryldy. Nátijesinde, BAÁ – meditsinalyq buiymdar jáne dárilik zattar shyǵaratyn zaýyt salý, Resei elimen – Evro-5 standartyna sai janar-jaǵarmai óndiretin munai óńdeý zaýytyn salý, al Qytai elimen birlese bioetalon, fosfor tyńaitqyshyn shyǵaratyn jáne 200 MVt kún elektr stantsiiasy qurylystaryn júrgizý maqsatynda kelisimderge keldi.
Respýblika boiynsha shaǵyn jáne orta kásipkerlik sýbektileriniń sany jaǵynan kósh bastaityn Ońtústikte búginde jumys istep turǵan ShOK sýbektileri 177 709 birlikke jetti. Al, bul salada jumyspen qamtylǵandar 331 490 adamdy qurady. Olarmen 158,3 mlrd. teńgeniń ónimi óndirilgen.
Sonymen qatar, Ońtústikte osy jyly 52 myńǵa jýyq jeke fermerlik qojalyqtardan biriktirilgen 297 kooperativ qurylyp, 539-ǵa jetti. Ótken jylǵa qaraǵanda 2 ese artqan kooperatsiia qurý jumystary boiynsha Ońtústik Qazaqstan oblysy respýblikada kósh bastap otyr.
Sessiiada óńir basshysynyń jumysyn oń baǵalaǵan halyq qalaýlylary aýdan, qalanyń damýy jáne turǵyndardyń ál-aýqatyn jaqsartý baǵytynda usynystary men ózekti máseleler boiynsha suraqtaryn qoidy.
Jiyndy qorytyndylaǵan oblys ákimi J.Túimebaev Memleket basshysynyń kóregendik saiasatynyń arqasynda oblystyń damýy úshin barlyq múmkindikter jasalynǵanyn aityp, óńirdiń áleýmettik-ekonomikalyq damý baǵytyndaǵy jumystardy júzege asyrýda birlese jumys isteýge shaqyrdy. Sondai-aq, ákim aimaq halqynyń turmys-tirshiligi jaqsaryp, alǵa qoiǵan mindetter oryndalyp jatqanyn jáne osy baǵyttaǵy jumystar álide jalǵasyn tabatynyn jetkizdi.
