1 aqpanda Premer-Ministr Álihan Smaiylovtyń tóraǵalyǵymen ótken Úkimet otyrysynda «Jekeshelendirýdiń 2021-2025 jyldarǵa arnalǵan keibir máseleleri týraly» Qaýlyǵa ózgerister engizildi, dep habarlaidy "Ult aqparat" Úkimettiń resmi saityna silteme jasap.
«Qujat jekeshelendirýge jatatyn memlekettik aktivterdi irikteý kriteriilerin bekitýdi kózdeidi.
Ekonomikany jańǵyrtý máseleleri jónindegi memlekettik komissiianyń jekeshelendirý týraly sheshimderi memlekettik múlik tiziliminiń jáne kvazimemlekettik sektor sýbektileriniń veb-portaldarynda jariialaýǵa jatady.
Sonymen qatar Memleket basshysy Qasym-Jomart Kemeluly Toqaevtyń tapsyrmasyn oryndaý aiasynda «Parlament depýtattaryna, Úkimet múshelerine jáne barlyq deńgeidegi ákimderge eńbekaqyny kóterýge moratorii engizý týraly» Qaýly qabyldandy» - delingen habarlamada.
Eske salaiyq, 11 qańtarda Májilis otyrysynda sóilegen sózinde Prezident Qasym-Jomart Toqaev Úkimet músheleriniń, depýtattar men ákimderdiń jalaqysy byltyr jyl aiaǵynda kóp talqylanǵanyn aitty.
"Meniń oiymsha, olardyń jalaqysy jetkilikti. Sondyqtan jalaqylaryn kóterýge 5 jyldyq moratorii jariialaýǵa bolady. Bul depýtattar úshin jaqsy jańalyq emes ekenin túsinemin. Biraq sizder túsinistikpen qaraisyzdar dep oilaimyn. Ákimshilik memlekettik qyzmetshiler men biýdjet qyzmetkerleriniń jalaqysyn múmkindiginshe kóterýdi jalǵastyramyz", - dedi sol kezde Qasym-Jomart Toqaev.
