QR Parlamenti Májilisine Qazaqstan halqy Assambleiasynan sailanǵan depýtattar sot-meditsinalyq saraptama salasyndaǵy kemshilikterdi aitty. Osy oraida Premer-Ministriniń orynbasary Berdibek Saparbaevtyń atyna depýtattyq saýal joldady, dep habarlaidy "Ult aqparat".
«Sot-meditsinalyq saraptama salasynda ilgerileýshilik baiqalmaidy. Bul salada qazir de maman jetispeýshiligi qatty seziledi. Al sot-meditsina sarapshylary bar aýdandarda mynandai qiyndyq aldan shyǵýda. Sot-meditsinalyq saraptama qazir Densaýlyq saqtaý ministrligine emes, Ádilet ministrligine qaraitynyna bailanysty sot-meditsinalyq sarapshylar ózderi jumys isteitin aýrýhanalardyń bas dárigerlerine tikelei baǵynbaidy. Qyzmet babynda jumys kúnderi óz mindetterin atqarǵanymen, senbi-jeksenbi kúnderi taptyrmaidy. Ol kúnderi kezekshilik atqarylmaidy. Sonyń saldarynan tosynnan kelgen ajal jaǵdaiynda (operatsiia ústinde, jol-kólik oqiǵasynan, qurylysta nemese óndiriste jaraqat alýdan, kisi qolynan bolatyn ólim tusynda) saraptama jasalýǵa tiisti máiit dúisenbige deiin aýrýhanada nemese máiithanada sol kúiinde jatyp qalatyn jaǵdai jii kezdesedi. Munyń aiaǵy marqumnyń denesin tórtinshi, tipti keide besinshi kúni ǵana jer qoinyna berýge uryndyrady», - dep toqtaldy depýtat Saýytbek Abdrahmanov Májilistiń jalpy otyrysynda.
Osy oraida S. Abdrahmanov bul qai jaǵynan da óte aýyr ekenin atap ótti. Halyqpen kezdesý barysynda osy jaidy jetkizýshiler sot-meditsina saraptamasy qyzmetin Ádilet ministrliginen qaitaryp, Densaýlyq saqtaý ministrligine berýdi usynǵan kórinedi.
«Biz olai etý durys dep sanamaitynymyzdy, kez kelgen salanyń qyzmetine baǵa beretin saraptama syrttan jasalýy jón ekenin aittyq. Biraq, máseleni mynandai jolmen sheshýge bolatyn siiaqty kórinedi. Sot-meditsina sarapshylarynyń demalys nemese mereke kúnderindegi kezekshiligin belgileý oilastyrylsa deimiz. Árine, ol kezekshilerdiń sol kúnderi jamanat bolyp qala ma dep aýrýhanada táýliktep otyrýy mindet emes, áitse de sol kúnderi uialy telefony qosýly, onyń ústine jumys babynda, iaǵni tosynnan shaqyrýǵa daiyn turýy mindetti dep sanalsa deimiz», - dedi depýtat.
