Májilis depýtaty Faizolla Qamenov «Shardara» sý qoimasy men «Kóksarai» sý rettegishiniń qaýipsizdigine qatysty máseleni kóterip, Úkimet basshysynyń orynbasary Roman Skliardiń atyna saýal joldady, dep habarlaidy "Ult aqparat".
«2020 jyldyń mamyrynda Ózbekstannyń Syrdariia oblysyndaǵy «Sardoba» sý qoimasyndaǵy bóget buzylyp sol eldiń 22 eldi mekenin sý basqanyn bilesizder. Syiymdylyǵy 922 mln tekshe metr bolatyn «Sardoba» sý qoimasy 2017 jyly salynǵan. Sý qoimasynyń biiktigi - 28,8 metr. Kórshi eldiń 70 myń adamy kóshirilip, bul apattan ońtústiktegi óz aǵaiyndarymyz da asa aýyr zardap shekken bolatyn. Túrkistan oblysynyń Maqtaral aýdanynda 845 úi, 3 mektep, 5 balabaqsha, 4 meditsina ǵimaraty men mádeniet úii jáne 54,7 km kópir men joldy sý alǵan. Syrdariia – transshekaralyq ózen. «Sardoba» sý qoimasy Ózbekstan jaǵynan sapasyz salynǵany óz aldyna, kóńildi alańdatatyn taǵy bir másele ol «Shardara» sý qoimasynyń tehnikalyq jaǵdaiy. Halyqtyń aitýy boiynsha, qoimanyń jaǵdaiy máz emes, qaýip tónip tur dep dabyl qaǵyp jatyr. «Sardoba» sý qoimasynyń sý jinaý múmkindigi 900 million tekshe metr bolatyn bolsa, «Shardara» sý qoimasynyń sý jinaý múmkindigi 5 milliard 200 million tekshe metr», - dedi depýtat Mádilistiń jalpy otyrysynda.
Onyń paiymynsha, «Shardara» sý qoimasy tehnikalyq-ekonomikalyq negizdeme negizinde qaitadan kúrdeli jóndeýden ótpese, ol ózinen 110 km tómende jatqan «Kóksarai» sý qoimasyn qosyp alyp ketedi. «Shardara» sý qoimasy óte úlken. Ekeýin qosqan kezde shamamen 8 milliard 200 million tekshe metr sý bolady.
«Budan shyǵatyn qorytyndy, «Shardara» sý qoimasy men «Kóksarai» sý rettegishiniń qaýipsizdigi óte mańyzdy másele. Osy sý qoimalarynyń qaýipsizdigi jóninde kezek kúttirmeitin máselelerdi Sý resýrstary komitetiniń basshysyna, Úkimetke taǵy da bir jetkizýdi ózimniń paryzym dep sanaimyn. Qurmetti Roman Vasilevich, joǵaryda baiandalǵannyń negizinde, Sizden osy depýtattyq saýaldy qarap jáne qabyldanǵan sharalar týraly Qazaqstan Respýblikasynyń qoldanystaǵy zańnamasyna sáikes jazbasha túrde joldaýyńyzdy suraimyn», - dedi depýtat Qazaqstan Halyq partiiasynyń fraktsiiasy atynan joldaǵan saýalynda.
