Májilis depýtattarynyń resmi saýalyna ýaqytyly jaýap bermegen QR BǴM Bilim berýdi tsifrlyq transformatsiialaý departamentiniń direktory tártiptik jaýapqa tartyldy. Bul týraly QR Premer-Ministri Asqar Maminniń depýtattar saýalyna bergen jaýabynda aitylǵan, dep habarlaidy "Ult aqparat".
«Qazaqstan Respýblikasymen Halyqaralyq qaita qurý jáne damý banki arasyndaǵy zaim týraly (orta bilimdi jańǵyrtý jobasyna) kelisim 2018 jyldyń 13 maýsymynda QR zańymen ratifikatsiialandy. Zaim somasy 67 mln dollardy quraidy. Zaim óteý kúni - 2020 jyldyń 31 jeltoqsany. Joba 2018-2022 jyldary aralyǵynda júzege asyrylady. Jobanyń maqsaty – orta bilim júiesi sapasyn jaqsartý jáne aýyl mektepteri oqýshylarynyń úlgerimin kóterý.
Jobanyń negizgi komponentteri – orta bilim berý júiesin jetildirýge qoldaý kórsetý, bilim nátijeleriniń aiyrmashylyǵyn qysqartý úshin aýyl mektepterine qoldaý kórsetý, jobanyń júzege asyrylýyn monitoringileý jáne baǵalaý. Jobany júzege asyrý aiasynda pedagog kadrlardy daiyndaityn 16 JOO 166,7 mln teńgege robototehnikalyq zerthanamen jabdyqtaldy. Sonymen qatar 2020 jyly jalpy somasy 686,6 mln teńgege 7 kelisimshart jasasý josparlanǵan. Onyń ishinde 656mln teńge bilim berý mazmunyn jańartý, qashyqtan oqytýdy monitoringileý, oqýdy baǵalaý júiesin jetildirý sharalaryn ótkizýge baǵyttalady»,- dedi Úkimet basshysy.
Premer-Ministrdiń atap ótýinshe, Bilim jáne ǵylym ministrliginiń aqparatyna sáikes, osy jyldyń 29 shildesindegi depýtattyq saýalǵa jaýap 2020 jyldyń 8 qyrkúieginde hatpen jiberilgen.
«Sizderdiń saýaldaryńyzǵa der ýaqytynda jaýap usynbaǵany úshin ministrliktiń Bilim berýdi tsifrlyq transformatsiialaý departamentiniń direktory tártiptik jaýapqa tartyldy. Buǵan qosa, qazirgi ýaqytta Qarjy ministrliginiń Ishki memlekettik aýdit komiteti 2016 jyldan bólingen qarajattyń paidalanylýyna aýdit nysanyn, sonymen qatar buǵan deiin júrgizilgen aýdit is-sharalarynyń nátijelerin aldyn ala zerdelep jatyr. Ol aiaqtalǵannan keiin tiisinshe aýditorlyq is-shara taǵaiyndalady. Tekserý qorytyndysy týraly sizderge ministrlik pen esep komiteti qosymsha aqparat beretin bolady. Jalpy, sizder kótergen másele Úkimettiń turaqty baqylaýynda», - dedi Asqar Mamin.
Buǵan deiin Respýblikalyq biýdjettiń atqarylýyn baqylaý jónindegi esep komiteti joǵaryda atalǵan máseleler boiynsha Bilim jáne ǵylym ministrliginiń shyǵystaryna aýdit júrgiziletindigin málimdegen edi.
