Foto: Tengrinews.kz/Turar Qazanǵapov
Májilis depýtattary Petropavl ataýyn Qyzyljar dep ózgertý týraly usynysqa pikir bildirdi, - dep habarlaidy Tengrinews.kz agenttigi.
Májilis kýlýarynda jýrnalister depýtattardan bul usynysqa qalai qaraitynyn surady.
Ermurat Bapidiń aitýynsha, halyqtyń bastamasy maqsatqa jetýi kerek.
"Birinshi kezekte mundai usynys azamattardan, qala turǵyndarynan túsýi tiis. Eger turǵyndar máseleni ózderi kóterip, myńdaǵan daýys jinap, olardy Parlamentke, bilikke berse, onda oryndaýda eshqandai problema joq. Bul bastama óz maqsatyna jetýi kerek dep sanaimyn. Petitsiia quryp, Úkimetke, memleketke suraq qoiý kerek. Men daiynmyn (bul máseleni Parlamentte kóterýge. - esk.), munda eshqandai problema joq", - dep túsindirdi depýtat.
Jýrnalist saýalyna jaýap bergen Aidarbek Qojanazarov týǵan qalasyn mysal retinde keltirdi.
"Men - Qostanaidanmyn, bizde Fedorov, Ýritskii aýdany, Lenin aýdany boldy. Biraq Ýritskii aýdanyn turǵyndardyń ózderi Sarykól aýdany dep ózgertýge bastamashy boldy. Al Fedorovte, kerisinshe, burynǵy ataýy saqtaldy. Biz halyqaralyq elmiz jáne barlyq múddeni eskerýimiz kerek. Atap aitqanda, onda turatyn adamdardyń múddesin (Petropavl. - esk.) jáne ol týraly oilaryn", - dedi májilismen.
Al "Aq jol" fraktsiiasynyń jetekshisi Azat Perýashev "Ákimshilik-aýmaqtyq qurylymdardyń ataýy Memleket basshysynyń quzyrynda" ekenin qysqasha atap ótti.
video: Tengrinews.kz
