QR Parlamenti Májilisindegi «Halyq kommýnisteri» fraktsiiasy Premer-Ministr Asqar Maminge qutqarýshylardyń jaǵdaiyn jaqsartý týraly depýtattyq saýal joldady, dep habarlaidy QazAqparat tilshisi.
Fraktsiia Memleket basshysy Qasym-Jomart Toqaevtyń Joldaýda azamattyq qorǵanys qyzmetine mán berip, ondaǵy qyzmetkerlerdiń jalaqysyn kóterýdi tapsyrǵanyn eske saldy jáne birqatar usynym jasady.
«Belarýs Respýblikasynyń mysalymen memlekettik órtke qarsy qyzmettiń qatardaǵy qyzmetkerlerine qosymsha jumys isteýine zańdyq quqyq berý kerek. Qazirgi ýaqytta Qazaqstanda buǵan tyiym salynǵan. Memlekettik órtke qarsy qyzmetke qabyldaý merzimin alty aidan úsh aptaǵa deiin qysqartqan jón. Sonymen birge, kóppáterli turǵyn úi, ónerkásiptik jáne áleýmettik nysandar qurylysynda jobalyq-smetalyq qujattama jasaýǵa órtke qarsy qyzmet mamandaryń qatysýyn mindetteý kerek», - dedi «Halyq kommýnisteri» fraktsiiasynyń múshesi Magerram Magerramov Májilistiń jalpy otyrysynda.
Sonymen birge, depýtat órtke qarsy qyzmet ǵimarattary men avtoparkin, qural-jabdyqtaryn kezeń-kezeńimen jańartýdy jáne qutqarýshylardyń zeinet jasyn tómendetýdi usyndy.
«Qutqarý qyzmetiniń zeinetke shyǵý jasyn politsiia men memlekettik qyzmetshiler jasyna sáikes tómendetý kerek. Búginde qutqarýshylar 63 jasqa deiin jumys isteýge mindetti. 60 jastaǵy sý qutqarýshysyn kózge elestetý qiyn. Depýtattyq saýalǵa zańmen belgilengen merzimde jaýap joldaýyńyzdy suraimyz», - dedi depýtat.
