© Sputnik / Abzal Kaliev
Májilis depýtattary Konstitýtsiiada Nursultan Nazarbaevtyń "Táýelsiz Qazaqstannyń negizin qalaýshy" degen mártebesin qaldyrýǵa qatysty pikir bildirdi, dep habarlaidy Sputnik Qazaqstan.
Zańnama jáne sot-quqyqtyq reforma komitetiniń tóraǵasy, depýtat Arman Qojahmetov Qazaqstannyń Tuńǵysh Prezidentiniń eńbegine qurmetpen qaraitynyn jetkizdi. Biraq onyń mártebesin Konstitýtsiiada kórsetilgenin qalamaidy.
"Men ózim Qazaqstannyń Tuńǵysh Prezidentiniń qyzmetin joǵary baǵalaimyn. Árine, ol kóp nárse istedi. Biraq Konstitýtsiiada belgili bir tulǵany erekshelep turatyn pozitsiialardyń bolmaǵanyn qalamaimyn", - dedi Qojahmetov jýrnalisterge bergen suhbatynda.
Osy oraida depýtat Konstitýtsiialyq keńeske engizilgen túzetýler boiynsha Ata zańymyzda "Qazaqstannyń Tuńǵysh Prezidenti - Elbasy" degen mártebeni alyp tastaý usynylǵanyn eske saldy.
Demek, "Qazaqstannyń Tuńǵysh Prezidenti - Elbasy týraly" konstitýtsiialyq zańnyń kúshi de joiylady. Alaida Nazarbaevtyń "Táýelsiz Qazaqstannyń negizin qalaýshy" mártebesin qaldyrýǵa usynys jasaldy.
"Menińshe, Konstitýtsiialyq keńes te qoǵamda san alýan pikirlerdiń bar ekenin biledi. Sondyqtan halyqtyń pikirin eskerip, sheshim shyǵarýǵa tiis. Konstitýtsiialyq keńes qaraýǵa engizilgen zań jobasyn ózgerte alady", - dep atap kórsetti komitet basshysy.
Májilismen Ǵaziz Qulahmetov te Ata zańda bir adamnyń kórsetilgenin qalap otyrǵan joq.
"Bul jerde Elbasynyń tarihtaǵy róli deidi. Jalpy, men óz basym Nazarbaevtyń, jalpy, qandai da bir adam atynyń zańda qalǵanyna qarsymyn. Ol jańashyldyqtardy quptamaimyn ", - dedi Qulahmetov Sputnik Qazaqstan tilshisine bergen suhbatynda.
