Májilis depýtaty Maqsat Ramanqulov qaýipti kásipterdiń barlyq ókilderine zeinetke shyǵý jasyn tómendetýdi surady, dep habarlaidy QazAqparat tilshisi.
«Jaqynda Qaraǵandydaǵy «Abai» shahtasynda kenshilerdiń qaza tapqany barlyǵymyzǵa belgili. «Aq jol» demokratiialyq partiiasy qaza bolǵandardyń týǵan-týystary men jaqyndaryna kóńil aitady jáne zardap shekkenderdiń tezirek saýyǵyp ketýin tileidi. Bul másele júzdegen metr jer astynda nemese ystyq metallýrgiialyq peshterde jumys isteitin adamdarǵa, atap aitqanda buryn «1-tizim jáne 2-tizim» boiynsha zeinetaqymen qamtamasyz etýge quqyǵy bar qaýipti jáne asa qaýipti kásipterdiń barlyq ókilderine áleýmettik ádilettilik máselesin taǵy da kúsheitti. Másele tek qaza tapqandardyń otbasylaryna tólemder men ótemaqylarda ǵana emes, olardyń jaqyndaryn endi eshqandai aqsha qaitara almaidy. Problema qandai da bir apatsyz-aq, osy qaýipti kásippen ainalysatyn jumysshylardyń kópshiligi zeinetkerlik jasqa jetpei-aq túrli syrqattarmen aýrýǵa shaldyǵýynda jáne óz mamandyǵy boiynsha jumys isteý qabiletin joǵaltyp, tipti kópshiligi zeinetkerlik jasqa deiin ómir súrmeýinde», - dedi M. Ramanqulov Úkimet basshysynyń orynbasary Eraly Toǵjanovtyń atyna joldaǵan saýalynda.
Osyǵan bailanysty «Aq jol» depýtattyq fraktsiiasy 1 jáne 2-tizimderge sáikes shahterler, metallýrgter jáne basqa da kásipter úshin zeinetke shyǵý jasyn qaitarý qajet dep sanaidy.
«Buryn bizdiń áriptesterimizdiń osyǵan uqsas saýalyna Eńbek ministrligi ziiandy eńbek jaǵdailarynda jumys isteitin azamattar zeinetaqy annýitetin 40 jastan paidalana alady, bul rette osyndai sharttar boiynsha tólemder 50 jastan bastalady dep jaýap bergen bolatyn.
Resmi saittaǵy aqparatqa sáikes, 40 jastan keiinge qaldyrylǵan zeinetaqy annýiteti úshin (50 jastan bastap tólemderdiń bastalýymen) minimaldy jetkiliktilik shegi búgingi kúni 6 mln teńge dep belgilendi, bul 5 jyl úzdiksiz kásibi zeinetaqy aýdarymdary bolǵan jaǵdaida ǵana múmkin», - dedi depýtat.
