QR Parlamenti Májilisiniń Áleýmettik-mádeni damý komiteti otbasylyq saiasat salasyna erler men áielderdiń teń quqyqtylyǵyna qatysty zańnamadaǵy olqylyqtardy joiýǵa baǵyttalǵan zań jobasyn jumysqa aldy, dep habarlaidy QazAqparat.
«Otbasylyq jáne genderlik saiasat máseleleri boiynsha QR-nyń keibir zańnamalyq aktilerine ózgerister men tolyqtyrýlar engizý týraly zań jobasyna Parlamenttiń bir top depýtaty bastamashylyq jasady. Zań jobasy otbasylyq saiasat salasyna erler men áielderdiń teń quqyqtylyǵyna qatysty zańnamadaǵy olqylyqtardy joiýǵa baǵyttalǵan», - dedi Májilistiń jalpy otyrysynda atalǵan komitetiniń tóraǵasy Beibit Mamyraev.
Depýtattyń atap ótýinshe, birqatar zańnamalyq aktige ózgerister men tolyqtyrýlar engizý qarastyrylyp otyr. Erler men áielderdiń teń quqyqtarynyń jáne teń múmkindikteriniń memlekettik kepildikteri týraly zańǵa teń saraptama, jynysy boiynsha statistika uǵymdaryn engizý, sondai-aq erler men áielderdiń kvazimemlekettik sektorda basshylyq jasaýy men basqarýǵa qatysýyna teń múmkindik berilýin retteý jáne basqa da túzetýler qarastyrylady.
«Komitet osy zań jobasyn jumysqa qabyldap, ol boiynsha 2020 jylǵy 23 jeltoqsanǵa deiingi merzimge qorytyndy ázirleýge daiyn», - dedi Beibit Mamyraev.
Osydan keiin Májilis depýtattary qaýly jobasyn biraýyzdan qoldap daýys berdi.
