Elordada Májilis jáne máslihat depýtattary jemqorlyqqa qarsy kúres qyzmetkerlerimen birge dárihanalardy aralap, preparattar baǵasyna monitoring jasady. "Ult aqparat" bul týraly Sybailas jemqorlyqqa qarsy is-qimyl agenttigi Nur-Sultan qalalyq departamentiniń baspasóz qyzmetine silteme jasap habarlaidy.
Búgin quramyna Nur-Sultan qalasynyń sybailas jemqorlyqqa qarsy qyzmet departamenti basshysynyń mindetin atqarýshy Mels Aqylbaev, departament basshysynyń birinshi orynbasary Jazira Jylqyshieva, Parlament Májilisiniń depýtaty Snejanna Imasheva, qalalyq máslihattyń depýtaty Ramziia Ómirbaeva, Densaýlyq saqtaý ministrligi Taýarlar men qyzmetterdiń sapasy men qaýipsizdigin baqylaý komiteti basqarmasynyń basshysy Erkebulan Baitýbaev, «Astana - Adaldyq alańy» jobasynyń menedjerleri men arnaiy baqylaý tobynyń músheleri engen jumys toby qala dárihanalaryna monitoring jasady.
Jalpy áleýmettik jeliler men «Astana - Adaldyq alasy» jobasynyń telefonyna azamattardyń qymbat baǵalary týraly 30-dan astam shaǵym túsken. Jumys toby 7 dárihanaǵa: Kerei men Jánibek handar kóshesindegi «Pýls» dárihanasyna, E16 kóshesindegi «Elhan» dúkenindegi dárihanaǵa, Qonaev kóshesindegi «ORYNKUL FARM» JShS-ǵa, Ábiken kóshesindegi «D3» dárihanasyna, Júrgenov kóshesindegi «Family Farm» dárihanasyna, «Áýlie-Ata», «OdAdoIa» jáne «Salamat» turǵyn úi keshenindegi dárihanalarǵa bardy.
Monitoring barysynda barlyq dárihanada koronovirýs infektsiiasyn jáne pnevmoniiany emdeýge arnalǵan azitromitsin, tamiflý, tseftriakson, kleksan, paratsetamol, aspirin, ingavirin, sýmamed, harelto siiaqty preparattardyń joqtyǵy anyqtaldy.
Abylaihan kóshesindegi 54 «a» mekenjaiy boiynsha bir ǵana dárihanada barlyq qajetti dári-dármek bar bolǵanymen, satyp alýshylardyń aitýynsha, uzyn-sonar kezek tańerteńnen tarqamaǵan. Sonymen qatar, azamattar ondaǵy baǵanyń shamadan tys bolýyna shaǵymdanǵan.
«Barlyq dárihanada farmatsevt-satýshylar densaýlyq saqtaý ministriniń dári-dármekti shekti baǵamen satý buiryǵyn bilmeitini belgili boldy. Antiseptikter bolmady. Satyp alýshylar arasyndaǵy qashyqtyq saqtalmai, baǵa belgileri kórsetilmei, litsenziialary ilinbegen. Jumys nátijeleri boiynsha Dári-dármek baǵasyn baqylaý jáne taldaý bóliminiń bastyǵy E.Baitýbaevqa anyqtalǵan zańbuzýshylyqtardy joiý boiynsha sharalar qabyldaý mindeti júkteldi. Sonymen birge ol dárihanalardyń basshylary men jaýapty tulǵalardy Densaýlyq saqtaý ministrliginiń shekti baǵa týraly buiryǵymen tanystyrýǵa mindetteldi», - delingen departamenttiń habarlamasynda.
Apta basynan beri elordanyń 24 dárihanasynda monitoring júrgizilgen. Bul baǵyttaǵy jumystar jalǵasýda.
Elordada dárihanalardaǵy zańsyzdyqpen betpe-bet kelseńiz +7 775 160 5532 WhatsApp-nómirine habarlasýǵa bolady.
