«Nur Otan» partiiasynyń bir top depýtaty Stalingrad shaiqasynda jeńiske jetýge erekshe úlken qosqan eki aýdanǵa «Áskeri dańq aýdandary» mártebesin berýdi surap, Úkimetke saýal joldady, dep habarlaidy QazAqparat.
«Úkimet basshysynyń orynbasary Eraly Toǵjanovqa depýtattyq saýal joldaýymyzǵa BQO-nyń Bókei orda men Jánibek aýdandarynyń ardagerler uiymynyń ótinishi sebep boldy. Biyl Jeńiske 75 jyl toldy. Atalǵan aýdandardyń turǵyndarynyń júregine soǵys jara qaldyrǵan. Stalingrad soǵysy úshin maidannyń janyndaǵy shepte turǵan olar talai ret bombanyń astynda qalǵan», - deidi Shavhat Ótemisov Úkimet basshysyna joldaǵan saýalynda.
Onyń aitýynsha, SSSR Qorǵanys Halyq Komissary I.Stalinniń 1941 jylǵy 26 qarashadaǵy №0444 buiryǵyna sáikes, Batys Qazaqstan oblysynyń Jánibek, Orda, Qaztalov, Fýrmanov aýdandarynyń aýmaqtary Stalingrad áskeri okrýginiń quramyna engen.
«Edildiń jaǵalaýyna jaqyn ornalasýy - Jánibek pen Orda aýdanynyń aýyldaryn da áskeri áreketter qaishylasqan aýmaqtarǵa ainaldyryp jiberdi. Tarih ǵylymdarynyń kandidaty P.R.Býkatkinniń málimetteri boiynsha fashistik aviatsiianyń bombalaýynyń aýqymy mynadai: 1942 jyldyń qazan jáne qarasha ailarynda ǵana fashistik nemis aviatsiiasy Saihin jáne Shýngai stantsiialarynyń tóbesinde 22 toptyq jáne 12 ret jalǵyz ushyp, oǵan jaýdyń 138 aviatsiiasy qatysqan. Mundai ushý jaǵdailary únemi ótkizilip turatyn. Jergilikti turǵyndarmen qatar Stalingradtan evakýatsiialanǵan adamdardy qosqanda myńdaǵan adam qaza tapty. Buǵan aýyldaǵy Jánibek jáne Saihyn aýyldaryndaǵy beiitter men qaza tapqandardyń eskertkishteri dálel», - deidi ol.
Depýtat sol kezde jergilikti halyq qatty qinalǵanyn, sonymen birge olar bombalaýdan qorǵanatyn oryndardy salýǵa belsene atsalysyp, jaýmen bir kisidei kúreskenin aitady.
«Osy jailardy atai kele Stalingrad shaiqasyndaǵy jeńiske BQO-nyń Jánibek pen Bókei Ordasy aýdanynyń qosqan úlesin zertteý boiynsha arnaiy komissiia qurýdy suraimyz. Sonymen birge Úkimet sheshimimen osy aýdandarǵa «Áskeri dańq aýdandary» mártebesin berý máselesin qarastyrýdy ótinemiz», - dedi ol.
