Búgin Májilistiń jalpy otyrysynda depýtat Erlan Smailov járdemaqy men zeinetaqy kólemin arttyrý máselesin kóterdi, dep habarlaidy QazAqparat.
«Azyq-túlik ónimi, kommýnaldyq qyzmet tarifi baǵasynyń turaqty ósýi men jalpy ómir súrý qunynyń qymbattaýy jaǵdaiynda múgedektigi bar adamdarǵa, bala týýyna bailanysty demalysta otyrǵan analarǵa, kópbalaly otbasylarǵa, zeinetkerlerge jáne halyqtyń basqa da tobynan shyqqan milliondaǵan qazaqstandyqtarǵa memlekettik járdemaqy men zeinetaqy kóleminiń artýy asa mańyzdy másele.
Prezident Qasym-Jomart Kemeluly Toqaevtyń sheshimi boiynsha 2022 jylǵy 1 qańtardan bastap eń tómengi jalaqy qazirgi 42 500 teńgeden 60 myń teńgege nemese 41%-ǵa ósedi. Alaida Eńbek jáne halyqty áleýmettik qorǵaý ministrligi múgedektigi bar adamdardyń, bir jasqa deiingi bala kútimine bailanysty úiinde otyrǵan analardyń, kópbalaly otbasylardyń járdemaqysyn, sonymen qatar eń tómengi zeinetaqyny ulǵaitý máselesin qarastyryp jatqan joq», - dedi E. Smailov Premer-Ministrdiń orynbasary Eraly Toǵjanovtyń atyna joldaǵan saýalynda.
Onyń aitýynsha, 2022-2024 jyldarǵa arnalǵan biýdjet jobasynda ministrlik áleýmettik járdemaqynyń barlyq túrin 2022 jylǵy 1 qańtardan bastap 5%-ǵa arttyrýdy josparlap otyr. Biraq bul kólem infliatsiianyń statistikalyq ósimi túgili, azyq-túlik pen kiimniń, túrli qyzmetter men tarif baǵasynyń shyǵynyn jappaidy.
«Járdemaqy men zeinetaqynyń mólsheri el azamattarynyń naqty qajettiligine sai kelmeitinin jáne olardyń sapaly ómir súrý deńgeiin qamtamasyz ete almaitynyn aiǵaqtaidy. Bul rette Eńbek jáne halyqty áleýmettik qorǵaý ministrliginiń qazaqstandyqtardyń múddesine sai kelmeitin ustanymda bolýy alańdatady. Halyqty qorǵap, Úkimet pen Ulttyq ekonomika jáne Qarjy ministrlikteri aldynda másele qoiýdyń ornyna, ministrlik biýdjet qarajatynyń tapshylyǵyna silteme jasaidy. Salalyq ministrlik halyqty qorǵaý jolyndaǵy óz missiiasynyń ideologiiasy men túsinigin áldeqashan joǵaltqan respýblikalyq uiymǵa ainaldy», - dedi depýtat.
Onyń paiymynsha, memlekettik organnyń mindetine atústi qaraýy eńbek salasyna da áserin tigizdi.
«Árine, memlekettik biýdjet sheksiz emes, alaida utymdy josparlaý men paidalaný arqyly onyń múmkindigin aitarlyqtai keńeitýge bolady. Bul týraly jyl saiyn Esep komiteti júzdegen milliard qarajat tiimsiz josparlanatyny jáne paidalanylatyny týraly qorytyndy beredi. Buǵan aýyl sharýashylyǵy salasyn sýbsidiialaý kezinde milliardtaǵan, tipti trilliondaǵan qarjynyń jymqyrylýy dálel», - dedi ol.
Joǵaryda aitylǵandarǵa bailanysty «Qazaqstan Halyq partiiasy» depýtattyq fraktsiiasy QR Úkimetine 2022 jylǵy 1 qańtardan bastap múgedektigi bar adamdardyń, bala kútimi boiynsha úide otyrǵan áielderdiń, kópbalaly otbasylardyń járdemaqysy kólemin arttyrýdy usyndy.
