Parlament Májilisiniń jalpy otyrysynda depýtattar áskeri zeinetkerlerdi baspanamen qamtamasyz etý máselesin kóterdi. Osy oraida QR Premer-Ministri Baqytjan Saǵyntaevtyń atyna depýtattyq saýal joldandy, dep habarlaidy QazAqparat.
«2017 jyldyń jeltoqsan aiynda áskeri qyzmetshilerdiń turǵyn úi máselesin sheshý boiynsha qosymsha sharalardy qarastyratyn «Qazaqstan Respýblikasynyń keibir zańnamalyq aktilerine turǵyn úi qatynastary máseleleri boiynsha ózgerister men tolyqtyrýlar engizý týraly» Qazaqstan Respýblikasynyń Zańy qabyldandy. Qorǵanys ministrliginiń derekterine sáikes, 2018 jyly aqshalai ótemaqy, turǵyn úi tólemderin alǵan Qarýly Kúshterdiń áskeri qyzmetkerleriniń jalpy sany 41 133 adam bolyp, olarǵa 54,6 mlrd teńge bólingen. Degenmen, Parlamenti Májilisine QR Qarýly Kúshteriniń qatarynda áskeri kúntizbelik eńbek ótili 2018 jyldyń 1-shi qańtaryna 10 jyldan asqan, biraq 20 jyldan az áskeri zeinetkerlerden olardyń turǵyn úi máselesin sheshý týraly kóptegen hattar keldi. Bul másele sailaýshylarmen kezdesýlerde de kóterilgen bolatyn», - dedi depýtat Nurtai Sabilianov.
Onyń sózine qaraǵanda, áskeri zeinetkerlerdiń osy sanatyna óńirlerde memlekettik turǵyn úi qorynan almasýǵa turǵynjailardyń bolmaýyna bailanysty turǵyn úiler áli berilmegen. 2018 jyly osy másele boiynsha Parlament Májilisine Aiagóz, Gvardeiskii, Arys, Jetigen jáne Shymkent áskeri garnizondarynyń áskeri zeinetkerlerinen hattar keldi.
Áskeri zeinetkerler óz hattarynda olardy zańnamaǵa sáikes turǵyn úimen qamtamasyz etýdi, al almasýǵa turǵyn úi bolmaǵan jaǵdaida, olarǵa turǵyn úi satyp alý úshin ótemaqy tóleýdi suraidy.
«Joǵaryda aitylǵandardyń negizinde, «Áskeri qyzmet jáne áskeri qyzmetshilerdiń mártebesi týraly» Zańynyń 55-babynyń 6-1-tarmaǵyn júzege asyrý boiynsha barlyq qajetti sharalardy qoldanýdy, sondai-aq óńirlerde memlekettik turǵyn úi qorynan almasýǵa turǵynjailar bolmaǵan jaǵdaida, osy sanattaǵy áskeri zeinetkerlerge aqshalai ótemaqy tóleý máselesin qarastyrýdy suraimyz», - dedi Nurtai Sabilianov.
