Parlament Májilisiniń jalpy otyrysynda depýtat Aigúl Nurkina jumys isteitin jastar úshin jalǵa beriletin páterler qurylysyn qarjylandyrýdy jalǵastyrýdy surady. Osy oraida Úkimet basshysy Asqar Maminniń atyna depýtattyq saýal joldandy, dep habarlaidy QazAqparat.
«El basshylyǵy jastar saiasatyna, atap aitqanda jastardy turǵyn úimen qamtamasyz etýge basa nazar aýdaryp keledi. Máselen, 2019 jyldan bastap Elbasynyń tapsyrmasy boiynsha jumys isteitin jastarǵa neǵurlym suranysqa ie mamandyqtar boiynsha Nur-Sultan, Almaty jáne Shymkent qalalarynda jaldamaly turǵyn úi beriledi. 2019-2020 jyldary jas mamandar men jas otbasylarǵa 4 myńǵa jýyq páter berildi. Biyl Nur-Sultan, Almaty jáne Shymkent qalalarynda taǵy 3 myń páter beriledi», - dep toqtaldy depýtat.
Onyń aitýynsha, «Nur Otan» partiiasynyń «Ózgerister joly: ár azamatqa laiyqty ómir!» sailaýaldy baǵdarlamasyn oryndaý jónindegi Jol kartasyna sáikes, Úkimet 2021-2025 jyldar aralyǵynda suranysqa ie mamandyqtar boiynsha jumys isteitin jastar úshin jyl saiynǵy negizde jalǵa beriletin páterler berýdi josparlap otyr.
«Sonymen qatar, turǵyn úi-kommýnaldyq damýdyń 2020-2025 jyldarǵa arnalǵan «Nurly jer» memlekettik baǵdarlamasyna sáikes, 2022 jyldan bastap jumys isteitin jastar úshin jalǵa beriletin páterler qurylysyn jyl saiyn qarjylandyrý qarastyrylmaǵan. Osyǵan bailanysty, memlekettik baǵdarlamaǵa jumys isteitin jastar úshin jalǵa beriletin páterler qurylysyn qarjylandyrýdy 2025 jylǵa deiin uzartý bóliginde ózgerister engizý qajet dep sanaimyz», - dedi Aigúl Nurkina.
