© Photo: pixabay/Couleur
Májilis depýtattary Jambyl oblysynda sharýalardyń sýsyz qalýyna bailanysty qyzmettik tergeý júrgizýdi talap etti, dep habarlaidy Sputnik Qazaqstan.
Depýtat Gúldara Nurymova biyl ońtústik óńirdiń sharýa qojalyqtary sýdan taryqqanyn eske saldy. Saldarynan Jambyl oblysynyń 6 aýdanynda tótenshe jaǵdai jariialanǵan.
"Qazsýshar oblysta qoldanystaǵy sýarmaly jerlerdi aǵyn sýmen qamtýdy jaqsartý úshin 2019 jyldan Halyqaralyq qarjy institýttarynyń nesiesi esebinen jalpy quny 40,0 mlrd teńgeni quraityn 2 joba júzege asyryp bastaǵan. Bul eki joba 2021 jyly bitip, jalpy 114 myń gektar alqapty sýmen qamtýy kerek edi. Alaida jobalaý-smetalyq qujattamanyń sapasyz ázirlenýine, jaýapsyz merdigerlerdiń jumysyna jáne "Qazsýshar" kásiporny tarapynan baqylaýdyń álsizdigine bailanysty jobalardyń aiaqtalýy biylǵy jeltoqsanǵa aýystyrylǵan. Jumystyń ýaqytyly aiaqtalatyny úlken kúmán týǵyzady", - deidi Nurymova premer-ministrdiń birinshi orynbasary Roman Skliarǵa joldaǵan depýtattyq saýalynda.
Buǵan qosa, onyń aitýynsha, atqarylǵan jumystardyń sapasy syn kótermeidi. Búgingi tańda jobalar aiasynda jospardaǵy 54 myń gektardyń tek 34 myń alqaby ǵana aǵyn sýmen qamtylǵan. Jaýaptylardyń salǵyrttyǵy saldarynan 20 myń gektarǵa jýyq jerdi ielenip otyrǵan sharýalar shyǵynǵa batyp jatyr.
"Olardyń shyǵynyn óteý boiynsha úkimetten bólinetin qarjy ár zardap shekken sharýaǵa ádil túrde jetýi kerek. Bul qalai qadaǵalanady? Al sharýalardy sýmen qamtýǵa qatysty syrttan alynǵan qaryzdardy qalai jáne kim óteidi? Bul máselege naqty kim jaýapty?", - dep surady depýtat.
Sondai-aq Nurymova aǵyn sýdy alý boiynsha qyrǵyz biligimen júrgizilgen kelissózderdiń ýaqytyly jasalmaǵany jáne nátijesiz bolýy sý tapshylyǵyn ýshyqtyryp otyrǵanyn atap ótti.
Ol mundai óreskel kemshilikterdiń bolýy salaǵa jaýapty tulǵalardyń tiisti quqyqtyq jaýapqa tartylmaýynyń saldary dep sanaidy.
"Bul kemshilikter kez kelgen salada qaitalanýy múmkin. Sondyqtan osy másele boiynsha qyzmettik tergeý júrgizilip, tiisti tulǵalar jaýap berýi tiis", - dep málimdedi Nurymova.
