Sońǵy kezderi áleýmettik qamtamasyz etý salasynda alaiaqtyq shemalar beleń ala bastady. Bul týraly Májilistiń jalpy otyrysynda depýtat Ekaterina Smyshliaeva málim etti, dep habarlaidy QazAqparat.
«Jyl saiyn zeinetaqy tóleý bóliginde memlekettiń áleýmettik mindettemelerin oryndaýǵa memlekettik biýdjetten 2 trln teńgege tarta qarajat bólinedi. Alaida sońǵy kezderi áleýmettik qamtamtasyz etý salasynda alaiaqtyq shemalar beleń ala bastady», - dedi E. Smyshliaeva Eńbek ministriniń atyna joldaǵan saýalynda.
Onyń aitýynsha, Qazaqstannyń aýmaǵynan tys jerde ómir súrip, basqa memlekettiń qamqorlyǵyndaǵy azamattar zańsyz túrde elimizdiń memlekettik qoldaýyna ie bolyp otyr. Iaǵni zeinetaqyny qosarlanǵan túrde alyp júrgender baiqalyp otyr.
Osyndai azamattarǵa qatysty talap-aryzdar sany men kólemi kún saiyn artyp keledi. Bul rette óndirip alýdyń ortasha somasy 6 mln teńgege deiin jetip jatyr. Nege osyndaiǵa jol berildi? Qazaqstandaǵy zeinetaqy týraly zańnamaǵa sáikes, elimizde turaqty ómir súrip jatqan azamattar, sheteldikter men azamattyǵy joq adamdar zainetaqy alýǵa quqyly. Osy tektes norma TMD-ǵa qatysýshy elderdiń azamattar quqyqtarynyń kepildigi týraly kelisimmen qamtylǵan memleketterdiń zańnamasynda da bar.
Sonymen qatar, bul qujatpen tólemdi toqtatý tártibi de retteledi. Kelisimniń 7 babyna sáikes, shartqa qatysýshy memleketterdiń aýmaǵynda zeinetker qonys aýdarǵan kezde, burynǵy turǵylyqty jeri boiynsha zeinetaqy tóleý toqtatylady. Bul rette osy tektes zeinetaqy túri jańa turǵylyqty jerindegi eldiń zańnamasynda qarastyrylýy kerek.
«Degenmen, olai bolmai tur. Basqa memlekette ómir súrip, sol eldiń azamattyǵyn alǵanymen, bul adamdar Qazaqstanda zeinetaqy tólemderin uzaq boiy alyp otyrýdy jalǵastyryp keledi. Sonymen birge, osy azamattar jańa turǵylyqty jerinde de zeinetaqyny rásimdep alady», - dedi depýtat.
Onyń sózine qaraǵanda, qonys aýdarǵandar kóbine ókiletti organdar men bankterdi eskertpeidi. Sáikesinshe, azamattyǵyn aýystyrǵany jaiynda jáne zeinetaqy tólemin toqtatý týraly habardar etpeidi.
Atalǵan kelisim 1992 jyly qabyldanǵanyna toqtalǵan ol, qazirgi kezde tsifrlandyrý men avtomattandyrý jaǵdaiynda kemshilikterdi túzetý múmkin ekenin atap ótti.
«Atalǵan problema shuǵyl sheshimdi qajet etedi. Joǵaryda atalǵandy eskere otyryp, Eńbek ministrligi ókiletti organ retinde zeinetaqany taǵaiyndaý men tóleý boiynsha memlekettik qyzmetke taldaý júrigizip, retteýdegi kemshilikter týraly tyńǵylyqty aqparat usynýy kerek dep sanaimyn. Kóshi-qon qyzmetimen birlese zeinetaqy alýshynyń elden ketýi faktisin tirkeý máselelerinde vedomstvoaralyq ózara is-qimyl algoritmderin iske asyrýdy ázirlep, qamtamasyz etken jón. Tehnologiialardyń damýyn eskerip, Syrtqy ister ministrligimen birlese halyqaralyq kelisimniń normalaryn qaita qaraýǵa bastamashylyq etken durys», - dedi depýtat.
