Depýtat Ashat Aimaǵambetov qazaqstandyqtardyń AHAJ-da zańdy túrde nekesin qimai turyp, meshitte nekesin qiiatyn imamdardy jazalaýdy usyndy, dep habarlaidy "Ult aqparat".
Májilismenniń aitýynsha, qazaqstandyqtar nekelerin resmi túrde tirkemei, imamnyń neke qiiý rásimimen shektelip jatyr.
«Siz aityp turǵan áreketterdi quptamaimyn, tipti zańsyz dep esepteimin. Bizde tiisti tártip boiynsha resmi tirkelgen neke ǵana zańdy bolyp esepteledi. Resmi tirkeýsiz qiylǵannyń bári neke bolyp eseptelmeidi. Demek, meshitte nemese shirkeýde ǵana qiylǵan neke zańdy neke bola almaidy», - dedi ol.
Sondai-aq, Ashat Aimaǵambetov zańda bul másele aiqyn rettelgenimen, meshitte ǵana neke qiia salý trendke ainalyp bara jatyr dep esepteidi.
«Shyn máninde bul zańǵa qaishy. Biz – zaiyrly memleketpiz. Neke qiiýdyń zańmen belgilengen tártibi bar. Resmi tirkeýsiz neke qiiatyn dini qyzmetkerlerdiń jaýapkershiligin talqylap, taldaý kerek. Men bul máselemen ainalysamyn», - dedi Ashat Aimaǵambetov.
