Foto: © Sputnik / Abzal Kaliev
Májilis depýtaty Murat Ábenov qazaqstandyq bankter arqyly sheteldikterge JSN berýge qarsy. Ol bolashaqta osyndai jaǵdailarǵa jol bermeý úshin tiisti sharalar qabyldaýdy surady, dep habarlaidy Sputnik Qazaqstan.
Depýtat buǵan deiin birqatar qazaqstandyq BAQ-ta Halyqqa qyzmet kórsetý ortalyqtaryna júktemeni azaitý úshin ekinshi deńgeili bankter arqyly sheteldikterge jeke sáikestendirý nómirin alý boiynsha memlekettik qyzmet kórsetý týraly sheshim qabyldanǵany týraly aqparat taraǵanyn eske saldy.
"JSN alǵan beirezidentke qazaqstandyq kompaniialardy qurýǵa, biznesti resmi júrgizýge, jeke jáne zańdy tulǵalarmen senimgerlik qatynastarǵa túsýge keń múmkindikter ashylady. Óitkeni otandastarymyz sheteldikte qazaqstandyq JSN bar ekenin bilip, jeke nómir berilmes buryn onyń derekterin ýákiletti organdar teksergenine, basqa eldiń azamaty Qazaqstan aýmaǵynda ekenine senimdi bolady", - deidi Ábenov.
Onyń aitýynsha, ekinshi deńgeili bankter arqyly JSN berý eldiń memlekettik jáne ekonomikalyq qaýipsizdigine tikelei áser etedi. Sebebi ol kóleńkeli ekonomika úshin qolaily ortany qalyptastyrýǵa, alaiaqtyqtyń taralýyna yqpal etedi, halyqaralyq sanktsiialardy ainalyp ótý táýekelderin týdyrady.
"Áleýmettik jelilerde kórshi elderden JSN-dy jáne bank kartasyn Qazaqstan aýmaǵyna kirmei-aq aqyly túrde alýǵa bolady degen aqparat tarady. Mundai jariialanymdardy ýákiletti organdar resmi túrde teriske shyǵarǵan joq", - deidi májilismen.
Depýtat aitýynsha, Ishki ister ministriniń buiryǵymen "Qazaqstan Respýblikasynda ýaqytsha bolatyn sheteldikterge jáne azamattyǵy joq adamdarǵa jeke sáikestendirý nómirin qalyptastyrý jáne túzetý" memlekettik qyzmet kórsetý qaǵidalary bekitildi, olardy berýdiń naqty rásimderi aiqyndalǵan. Qaǵidalarǵa sáikes, qujat qabyldaý jáne memlekettik qyzmet kórsetý nátijesin berý tek HQKO nemese egov.kz portaly arqyly júzege asyrylady. JSN berý qyzmetterin kórsetý tiziminde ekinshi deńgeili bankter joq.
Osyǵan bailanysty Ábenov Tsifrlyq damý, innovatsiialar jáne aeroǵarysh ónerkásibi ministrligine ekinshi deńgeili bankterge JSN berýge ruqsattyń kúshin joiýdy usyndy. Sondai-aq bolashaqta osyndai jaǵdailarǵa jol bermeý úshin tiisti sharalar qabyldaýdy surady.
Buǵan qosa, ol Bas prokýratýra men Antikorǵa memlekettik fýnktsiialardy jeke uiymdarǵa berý bóliginde zańnamany buzý múmkindigin tekserýdi usyndy.
