Sýret: ortcom.kz
Búgin Májilistiń jalpy otyrysynda depýtat Naýryz Sailaýbai mektepterdegi sybailas jemqorlyq máselesin kóterip, Oqý-aǵartý ministri Ǵani Beisembaevtyń atyna saýal joldady, dep habarlaidy "Ult aqparat".
Depýtattyń aitýynsha, eden jýýshy, kúzetshi, tipti aýla sypyrýshy bolyp jumysqa turý úshin de jemqorlyq júiesiniń bir bólshegine ainalýyń kerek.
"Tarihy tereń bilim ordalaryndaǵy jemqorlyq jáne búldirshinderdiń tamaǵyna talasqandar qazirgi tańda shákirtke tulǵa bola almai tur. Jeń ushynan jalǵasqan jemqorlyq áreketi mektepke qarapaiym eden jýýshy, kúzetshi jáne aýla sypyrýshy bolyp jumysqa turaiyn deseń de jaǵańnan alyp, tyǵyryqqa tireidi. Ustaz bolyp, shákirt tárbileimin deseńiz onyń stavkasy bólek áńgime. Joǵary oqý ornyn bitirip, jumys istegisi keletin jas mamannyń saǵy synyp, osynyń kesirinen basqa salaǵa ketýge májbúr. Máselen, biyl Qyzylorda oblysy Jańaqorǵan aýdandyq soty «Jańaqorǵan aýdanynyń bilim bólimi» MM basshysy, bas býhgalteri jáne 24 mekteptiń býhgalterlerine jalpy somasy 1 mlrd teńgeden asa iri mólsherde biýdjet qarajatyn jymqyrǵany úshin úkim kesti. Bul bir aýdandaǵy áshkere bolǵan áreketterdiń biri ǵana", - dedi Naýryz Sailaýbai.
Sonymen qatar depýtat bilim oshaqtaryndaǵy búldirshinderge beriletin ystyq tamaqtyń jaǵdaiy jii synǵa ushyraitynyn eske saldy.
"2023 jyly osy jemqorlyqtyń kesirinen 192 qylmystyq is qozǵalyp, 13 milliard teńge jymqyrylǵan. Iri jymqyrýlar Jetisý, Qyzylorda, Túrkistan oblystary men Almaty qalasynda oryn aldy. Bul jerdegi jemqorlyq shemasy 1 jyldyq emes, ondaǵan jyldar boi jumys istep kele jatqan úlken bir júie», - dedi ol.
Bul turǵyda Naýryz Sailaýbai birneshe usynysyn jariialady. Birinshiden, esep-qisap júileri arasyndaǵy bailanysty túzetý kerek. Bul jerde bilim bólimi basshysy, direktor men býhgalterdiń arasyndaǵy syibailastyǵyn joiýǵa nazar aýdarý mańyzdy.
Sondai-aq depýtattyń aitýynsha, mektepterde muǵalimderden qarajat jinaý júiesin joiý kerek.
"Belgisiz fondtarǵa" kerekti qural-jabdyqtar alamyz degen bastamamen aqsha jinalady. Negizinde, bilim ordasyna kerek keńse taýarlaryna Úkimettken tikelei qarajat bólinbei me? Budan bólek, oblys, aýdan, qala arasyndaǵy biýdjettik jospar men bólinistiń ashyqtyǵy jáne osy júieni tsifrlandyrý arqyly aqparattyq ashyq bolýy qamtamasyz etilýi tiis", - dedi depýtat.
