2021 jyly Qazaqstanda 12,8 myń áýe reisi keshikken jáne onyń 912-sine ǵana aýa raiynyń qolaisyzdyǵy sebep bolǵan. Bul týraly Májilis depýtaty Elnur Beisenbaev QR Premer-Ministriniń birinshi orynbasary Roman Skliarǵa saýal joldady, dep habarlaidy QazAqparat.
Depýtat eldegi shekteý sharalary alynǵanyn, halyqtyń qalypty ómirge oralyp, júk jáne jolaýshylar tasymaly qaita jandanyp, ushaqtardyń ushý júiesi iske qosylǵanyn atap ótti.
«Pandemiianyń ýaqytynda ushý jiiligi keminde 1,5 esege azaiǵanyn eskersek, qazir elimizdegi eń iri aviakompaniialarǵa (Air Astana, SCAT, Qazaq Air) tiesili reisterdiń jiiligi qaita qalpyna keltirildi. Degenmen, elimizdegi reisterdiń keshigýi men keshigý barysyndaǵy kórsetiletin qyzmet sapasyna bailanysty halyq arasynda narazylyq bar ekenin moiyndaýymyz qajet. Mysaly, 2020 jyldyń qorytyndysy boiynsha 51 myńǵa jýyq reistiń 6735 reisi keshiktirilgen, iaǵni shamamen árbir 8-shi reis keshigip ushqan. Al 2021 jyly ushqan 68,7 myń reistiń 12,8 myńy keshiktirilip, árbir júieli reistiń besinshisi ýaqytynda ushpaǵandyǵy anyqtalyp otyr. Iaki, ushý reisteri aitarlyqtai kóbeimese de, borttardyń keshigý sebepteri shamamen eki esege kóbeigen», - dedi Beisenbaev Májilistiń jalpy otyrysynda.
Mundai jaǵdaida áýe kompaniialardyń jaýaby «aýa raiynyń qolaisyzdyǵyna» kelip tireledi. Biraq, 2021 jyldyń qorytyndysy boiynsha 12,8 myń keshikken reistiń 9045-i borttyń keshigip kelýine bailanysty oryn alǵan. Onyń ishinde «SCAT», «Qazaq Air» áýekompaniialarynyń árbir tórtinshi reisi keshiktirilip otyr. Al, eń qyzyǵy aýa aiynyń qolaisyzdyǵyna bailanysty degen tarmaqpen nebári 912 reis keshikken.
«Ózderińiz biletindei, ishki reisterdiń jiiligin kóbeitý men halyqtyń ushaqpen paidalaný deńgeiin arttyrý úshin Úkimet 2022 jyly 24 baǵyttaǵy reisterdi sýbsidiialaýǵa 5,9 mlrd teńge bóldi. Al, onyń ishinde 16 baǵyt boiynsha 5 mlrd teńge «SCAT», «Qazaq Air» kompaniialaryna bólinetinin eskersek, olardyń qandai sapaly qyzmetine osynsha qarjy bólinýi tiis? Reistiń keshigýi boiynsha sms-habarlamany arnaiy qyzmet retinde aqyly paidalanamyz. Al «Áýe keńistigin paidalaný jáne aviatsiia qyzmeti týraly» Zań baptaryna sáikes, áýe kompaniiasy kinásinen reisterdi keshiktirý nemese olardyń bolmaýy kezinde usynýǵa mindetti ystyq tamaq, qonaq úige ornalastyrý, kólik transferti qyzmetterin ishki reisterde sapaly uiymdastyrǵanyn estimedik. Tek, BAQ-tyń aralasýy arqyly qoǵamdyq rezonans týdyrǵanda ǵana tutynýshylar qol jetkizip jatady. Osy rette, tiesili ministrlik tarapynan keshigýdi qalypty jaǵdai retinde qabyldamai, kerisinshe qyzmet sapasyn kóterýge baǵyttalǵan jumystardy retteý qajet ekenin eskertemiz», - dedi Májilis depýtaty.
Sondai-aq, áýekompaniialardyń onlain tirkeý qyzmetin kórsetýdegi arnaýly aqyly oryndardyń baǵasy boiynsha shaǵymdar jiilep keledi.
«Birinshiden, loýkosterdegi tegin oryndardyń ózi avtomatty túrde tańdalady. Ekinshiden, Air Astana kompaniiasynyń ekonom sanattaǵy aqyly oryndary 15 myń, al loýkester sanalatyn Fly Arystan kompaniiasynda 6,5 myń teńgege deiin jetedi. Yńǵailylyq úshin bilet qunynyń jartysyn tóleý qanshalyqty ádiletti? Bul ishki reisterdegi yńǵaily orynnyń quny, al ózge elden ushatyn ýaqytta arnaýly orynnyń baǵasy eki esege artady. Mysaly, Túrkiiadan Air Astana kompaniiasynyń aqyly oryn qyzmeti 25 myń teńgege jetedi. Qurmetti, Roman Vasilevich! Qoryta aitqanda, jyl ótken saiyn qazaq áýeindýstriiasynyń ahýalylyn eýropalyq standarttarǵa sai retteýimiz qajet. Aldaǵy jazǵy demalys kúnderinde, eldiń sapar bailanysyn ýaqyttynda sapaly qamtamasyz etý úshin reisterdiń keshigý jiiligin retteýdi qolǵa alýyńyzdy suraimyz», - dedi Beisenbaev.
