Foto: qamshy.kz
Májilis depýtaty Elnur Beisenbaev iri kinoteatr jelileri kórsetilimniń birinshi kúninen bastap kassalyq kiristiń 50%-yn turaqty túrde alyp, rejisserler men prodiýserlerdi ádil tabystan aiyryp otyrǵanyn málimdedi, dep habarlaidy Ult.kz.
Onyń sózinshe, film jasaýshylar monopolisterdiń qysymy saldarynan únsiz qalýǵa májbúr, sonymen qatar qosymsha jarna men nasihattaý shyǵyndaryn tóleýge, sonyń ishinde «kórinbeitin» tólemderge de mindetti.
Foto: Májilis
«Arnaiy narazylyq týdyrǵany – memlekettik qarajatqa túsirilgen filmderdiń kirisinen de bólikti ustap qalý: mysaly, biýdjetten 190 mln teńgege qarjylandyrylǵan «Qaitadan» filmi bir milliardtan astam qarajat jinaǵan, biraq kinoteatrlar 550 mln teńgeni ózine alǵan», - degen Beisenbaev mundai tájiribe otandyq kino biznestiń damýyna kedergi jasap, mańyzdy tarihi jáne mádeni jobalardyń paida bolýyna tosqaýyl bolatynyn atap ótti.
Depýtattyń sózinshe Kinopark jáne Kinoplexx eldegi barlyq kinoteatr zaldarynyń 40%-na deiin baqylaýdy júzege asyrady. Al Chaplin jáne Cinemax jelileri megapolisterde ústemdik júrgizip otyr. Sondyqtan depýtattyń pikirinshe bul másele Básekelestikti qorǵaý agenttigi jáne basqa da tiisti memlekettik organdardyń nazaryn aýdarýy kerek.
Depýtat E. Beisenbaev Qazaqstan Respýblikasynyń Básekelestikti qorǵaý jáne damytý agenttiginiń tóraǵasyna M. Omarovqa joldaǵan saýalynda kinoteatrlar, prokatshylar jáne kinostýdiialar arasyndaǵy qoldanystaǵy kelisimsharttardy tekserýdi, sondai-aq kinoteatr jelilerin óz ústemdigin paidalanyp, negizsiz 50% paida alý faktilerine qatysty keshendi tekserýdi uiymdastyrýdy surady.
