© Photo: CC0 / Michelle Maria
Qazaqstan Úkimeti bailyqqa salyq salý máselesin qarastyryp jatyr. Bul týraly senat otyrysynda qarjy vitse-ministri Marat Sultanǵaziev aitty, dep habarlaidy Sputnik Qazaqstan.
25 qarasha kúni senat Salyq kodeksine ózgerister men tolyqtyrýlar engizý týraly zań jobasyn qarastyrdy. Suraq-jaýap barysynda depýtat Murat Baqtiiaruly bailyqqa salyq salý máselesin taǵy qozǵady.
Aitýynsha, sán-saltanat salyǵy kóptegen elde bar.
"Bul jerde qymbat elitaly jyljymaityn múlikter, ushaqtar, iahtalar, qymbat avtokólikter, zergerlik buiymdar siiaqty sán-saltanatqa salyq engizý elde salyq salýdyń ádiletti júiesin qalyptastyrady dep oilaimyn. Osydan bir jyl buryn bul suraqty ulttyq ekonomika ministrligine qoiǵan kezde olar osy baǵytta jumys isteimiz degen bolatyn. Biraq, ókinishke qarai, myna Salyq kodeksinen muny kórip turǵan joqpyz. Osyǵan bailanysty eki ministrliktiń (Ulttyq ekonomika jáne qarjy ministrlikteri) pikiri qandai?", - dep surady Murat Baqtiiaruly.
Senatordyń saýalyna qarjy vitse-ministri Marat Sultanǵaziev jaýap berdi.
"Biz oǵan (sán-saltanatqa – Sputnik) salyqty qarastyryp jatyrmyz. Biznespen aqyldasyp jatyrmyz. Kelesi jyly úkimet jobasymen engiziledi", - dep qysqa qaiyrdy sheneýnik.
2020 jyly senat depýtaty Murat Baqtiiaruly elde bailyq salyǵyn engizýdi usynǵan edi. Depýtattyń pikirinshe, aýqatty qazaqstandyqtar halyq aldynda áleýmettik jaýapkershilik alyp, óz bailyǵyn eldiń damýyna baǵyttaýǵa tiis.
Sol kezdegi ulttyq ekonomika ministri Rýslan Dálenov Úkimettiń bailyqqa salyq engizý jospary bar ekenin málimdegen bolatyn.
