Parlament Májilisiniń depýtaty Balaim Kesebaeva Qazaqstanda aliment boiynsha bereshek soma 5,5 mlrd teńgeni quraǵanyn aitty, dep habarlaidy QazAqparat.
«Aliment boiynsha qujattar sany jyl saiyn ósip otyr. 2019 jyldyń 9 aiynyń qorytyndysymen aliment boiynsha bereshek soma 5,5 mlrd teńgeni (2016 jyly – 1,8 mlrd) quraǵan. Bul júzdegen myń balany ata-anasy tiisinshe qamtamasyz etpei otyr degen sóz. Aliment óndirý qashanda qordalanǵan problemalardyń biri bolyp keledi. Bul problema sheshiminiń árdaiym tabylmaýy - halyqtyń áleýmettik osal toptaryn, iaǵni analardy turmystyq qiyndyqtarǵa soqtyratyny bizdi qynjyltady», - dep toqtaldy depýtat Parlament Májilisindegi Úkimet saǵatynda.
Osy oraida ol aliment óndirý týraly atqarýshylyq qujattardy oryndaýǵa kedergi keltiretin negizgi problemalarǵa toqtaldy. Bul rette sot oryndaýshylary tarapynan atqarýshylyq qujattardyń uzaq ýaqyt boiy oryndalmaýy, aliment óndirip alý jóninde qajetti sharalardyń qabyldanbaý máselesi kóterildi.
«Kóbine jumys berýshiler jalaqyny «qolma qol» jáne «konverttermen» tóleidi, aliment boiynsha tólemderdi ádeii boldyrmaidy, sondai-aq boryshkerlerdiń jalaqysynyń mólsherin tómendetip kórsetedi, osylaisha kásiporyn basshylary biýdjetke salyq tóleýden de jaltarady. Sonymen qatar, boryshkerlerdi izdestirý tetiginiń tiimdi nátijeleri joq. Aliment tólemegeni úshin boryshkerlerdi jaýapqa tartýdyń tiimsizdigi baiqalýda», - dedi B. Kesebaeva.
Budan bólek ol boryshkerdiń turaqty jumys orny men múlki bolmasa, onda jeke sot oryndaýshy odan obektivti túrde eshteńe óndire almaitynyn atap ótti.
Depýtattyń paiymynsha, sot oryndaýshylarynyń alimentterdi óndirip alý týraly isterdi ýaqytyly jáne tolyq oryndaýyna baqylaýdy júieli túrde júrgizý kerek. Jalpy, aliment boiynsha boryshkerlerdi jumysqa ornalastyrý máselesin sheshý qajettigi bar.
«Aliment tóleýden jaltarý bóliginde, jumys berýshiler men boryshkerlerdiń sóz bailasý faktilerin anyqtaý jáne jolyn kesý qajet. Boryshkerlerdi izdestirý, májbúrlep ákelý jáne ustaý tetigin jetildirý de mańyzdy», - dedi B. Kesebaeva.
Onyń aitýynsha, balanyń qajettiligin jáne onyń jasyn eskere otyryp, aliment mólsherin aiqyndaýdyń tártibin ózgertý, alimenttiń eń tómengi mólsherin belgileý kerek.
«Búginde, aliment mólsheri boryshkerdiń jalaqysynan úles arqyly anyqtalady jáne balalardan góri boryshkerdiń múddesi kóbirek eskeriledi. Al, boryshkerler balalarǵa aiyna 5-6 myń teńge ǵana tóleý arqyly jaýapkershilikten qashýdyń zańdy ádisin burynnan oilap tapqan. Negizinde, aliment mólsherin anyqtaǵan kezde balanyń múddelerine basymdyq berilýi tiis», - dedi depýtat.
