Depýtat kez kelgen eldegi qaýipsizdik pen quqyq tártibiniń kepili soǵysqa qabiletti ásker, quzyretti jáne myqty politsiia degen pikir bildirdi. Dál sol kezde olar óz eliniń azamattaryn qorǵaýǵa janqiiarlyqpen kirisetinin aitty.
"Sondai-aq, memlekettiń osy irgeli institýttary Otan múddesi úshin qyzmet atqarýǵa tolyq berilýi úshin barlyq jaǵdai jasalýy tiis. Muny Memleket basshysy 11 qańtarda Májiliste sóilegen sózinde atap ótti", - dedi Gúlnar Bijanova.
Onyń aitýynsha, qazir quqyq qorǵaý organdarynda qyzmetti jetildirý máselelerine qatysty zań jobasy boiynsha jumys júrgizilip jatyr. Jumys toby qyzmetkerlerdi áleýmettik jáne materialdyq qoldaýǵa, olardy turǵyn úimen qamtamasyz etýge, sondai-aq, qyzmetin oryndaý kezinde qaza tapqan qyzmetkerlerdiń otbasylaryn qorǵaýǵa baǵyttalǵan birqatar túzetý engizedi.
"Qańtarda quqyq qorǵaý organdarynyń qyzmetkerleri qaza tapty. Olardyń balalary asyraýshysyz qaldy. Olardy memleket qamqorlyǵynsyz qaldyra almaimyz. Sondyqtan osyndai otbasylarǵa zańmen belgilengen qarajattyń 40 paiyzy mólsherinde ai saiynǵy tólem taǵaiyndaýdy usynamyz. Qaza tapqandardyń balalaryna oqýǵa memlekettik granttar berilsin", - dedi ol.
Alǵan jaraqat saldarynan qyzmetin jalǵastyrý múmkindigin joǵaltqandar da erekshe áleýmettik kómekke laiyq ekeni aityldy.
"Olarǵa eńbek sińirgen jyldaryna qaramastan zeinetaqy taǵaiyndaý ádiletti bolady dep esepteimiz. Sondai-aq, qyzmettik boryshyn oryndaýǵa bailanysty qyzmetkerdiń múlkine keltirilgen zalaldy óteý, qarjyny qaita esepteý, qyzmetkerler men olardyń otbasylaryn quqyqtyq jaǵynan qorǵaý boiynsha túzetýler engiziledi", - dedi Bijanova.
Qorytyndylai kele, Májilistiń jalpy otyrysyna qatysýshylarǵa arnaǵan sózinde Gúlnar Bijanova olardy "aiqyn kórinisti qabyldaýǵa" shaqyrdy.
"Qyzmetker ózi, otbasy, balalary memlekettiń senimdi qorǵaýynda ekenine senimdi bolǵanda ǵana el úshin shaiqasqa shyǵady. Bizdiń basty mindetimiz - onyń buǵan degen senimdiligin zańnamalyq túrde qamtamasyz etý", - dep qorytyndylady depýtat.
