Májilis depýtaty Aleksandr Miliýtin gaz taratý júileri qurylysy jobalaryna nazar aýdarýǵa shaqyrdy. Osy oraida ol Indýstriia jáne infraqurylymdyq damý ministri Beibit Atamqulovtyń atyna depýtattyq saýal joldady, dep habarlaidy "Ult aqparat".
«Bizdi elordanyń turǵyn úi aimaqtarynyń, sondai-aq Soltústik jáne Ortalyq Qazaqstannyń birqatar qalalary men eldi mekenderiniń gaz taratý júieleri men qurylysy jobalarynyń sapasy alańdatady. Bul qazir «Saryarqa» magistraldyq gaz qubyry boiynsha elimizdiń batys óńirlerinen tabiǵi gaz tartý aiasynda erekshe ózekti bolyp otyr. Jeke tulǵalarǵa beriletin tehnikalyq sharttar, sondai-aq olardyń gazben jabdyqtaý júiesine qosylýǵa arnalǵan shyǵystary gaz taratý júieleri qalai jobalanatyndyǵyna bailanysty bolady. Árine, biz turǵyndardyń shyǵyny meilinshe az bolǵanyn qalaimyz. Sondyqtan taratý jelileri jobasynyń bir bóligi retinde «aqyldy eseptegishterdi» ornatýdy usyndyq. Al biz úshin eń mańyzdysy – azamattarymyzdyń qaýipsizdigi. Osyǵan orai biz qurylys normalary men erejeleriniń jetilmegendigine bailanysty qaita júginip otyrmyz», - dedi A. Miliýtin Májilistiń jalpy otyrysynda.
Onyń paiymynsha, tiisti shemalar elimizdiń ońtústik óńirlerinde senimdi jumys istei alady, biraq olar soltústik aimaqtar úshin qolaily emes.
«Óitkeni qysym rettegishteri men esepteý quraldary -25 gradýstan tómen temperatýraǵa arnalmaǵan. Reseidiń jáne elimizdiń jekelegen sýyq aimaqtarynyń tájiribesi soltústik aimaqtar úshin qysym rettegishteri men esepteý quraldaryn jyly jaǵdaida ornalastyrýdy qamtamasyz etetin gazben jabdyqtaý shemalarynyń basymdylyǵyn kórsetedi. Alaida ótinishten kórinip turǵandai, jobalaý uiymdary joǵaryda atalǵan sebepterge bailanysty bul oń tájiribeni qoldana almaidy. Bul gaz plitalaryna janarmai berýdiń múmkin bolatyn úzilisterimen bailanysty yńǵaisyzdyqty aitpaǵanda, keibir jaǵdailarda jeke úilerde turatyn gaz qazandyqtary bar azamattardyń qysta jylytýsyz qalýyna ákep soqtyrýy múmkin. Sondyqtan fraktsiianyń depýtattary biz kótergen máselelerdi qarastyryp, olar boiynsha sheshim qabyldap, jaýabyn zańnamada belgilengen merzimde usynýdy suraidy», - dedi depýtat.
