Foto: baq.kz
Taraz soty prezidenttikke eks-kandidat, Májilistiń qazirgi depýtaty Jigýli Dairabaevtyń uldaryna qatysty alaiaqtyq týraly qylmystyq isti qarady, dep habarlaidy "Ult aqparat".
Taraz qalasy №2 soty sýbsidiialardy urlaý týraly is boiynsha úkim shyǵardy. Qylmystyq kodekstiń 190-baby 4-bóligi 2-tarmaǵy alaiaqtyq, iaǵni adamdarmen aldyn ala sóz bailasý arqyly asa iri mólsherde bótenniń múlkin jymqyrý nemese aldaý nemese senimdi teris paidalaný jolymen bóten múlikke quqyqty iemdený boiynsha 4 adamǵa qatysty qylmystyq is qaralǵan. Olardyń qatarynda "Jambyl oblysy ákimdiginiń aýyl sharýashylyǵy basqarmasy" MM basshysynyń ósimdik sharýashylyǵy máseleleri jónindegi orynbasary bolǵan Erlan Kúlkeev, kásipkerler Eljan Elibai, Marat Dairabaev jáne Didar Moldaqalyq bar.
Nátijesinde sot "Jambyl oblysy ákimdiginiń aýyl sharýashylyǵy basqarmasy" MM basshysynyń ósimdik sharýashylyǵy máseleleri jónindegi orynbasary bolǵan Erlan Kúlkeev, sondai-aq kásipkerler Eljan Elibai, Marat Dairabaev jáne Didar Moldaqalyq sýbsidiialaý qaǵidalaryn buzyp, satyp alynǵan "Albion" qulpynai kóshetteri úshin (olardy sharýa qojalyqtaryna rásimdep) memlekettik sýbsidiialar alǵanyn, olardyń bir bóligi alaiaqtyq jolymen urlanyp, jeke qajettilikterine jumsalǵanyn, osylaisha, memleketke 550 849 430 teńge kóleminde zalal keltirgenin anyqtaǵan.
Marat Dairabaev pen Didar Moldaqalyq - Májiliske "Aýyl" partiiasynan sailanǵan Jigýli Dairabaevtyń uldary. Bul málimetti Jambyl oblystyq sotynyń sýdiasy Ǵalym Kúlekeev rastady. Olardyń kinási jinalǵan dáleldemelermen, kýálerdiń aiǵaqtary, beinejazbalar, sarapshylardyń qorytyndylarymen dáleldengen. Prokýror qylmystardyń jiyntyǵy boiynsha Dairabaev pen Moldaqalyqqa túpkilikti árqaisyna 5 jylǵa bas bostandyǵynan aiyrý jazasyn surady. Sottalýshylar kinálerin moiyndamai, aqtaýdy suraǵan.
Jaza taǵaiyndaý kezinde sot qylmystyq jaýaptylyq pen jazany aýyrlatatyn mán-jaiǵa Kúlkeevtiń kásibi antty buzǵanyn, al jeńildetetin jaǵdailarǵa sottylyqtarynyń bolmaýy men Kúlkeevtiń, Dairabaevtyń, Moldaqalyqtyń kishkentai balalary bolýyn jatqyzǵan.
"Dairabaev pen Moldaqalyqtyń múlki tárkilenip, kez kelgen menshik nysanyndaǵy uiymdarda basshylyq laýazymdy atqarý quqyǵynan aiyra otyryp, túpkilikti árqaisyna 5 jylǵa bas bostandyǵynan aiyrý jazasy, Qylmystyq kodekstiń 63-babyn qoldanyp, probatsiialyq baqylaýǵa belgilene otyryp shartty túrde taǵaiyndaldy. Úkim zańdy kúshine áli engen joq", - delingen habarlamada.
