Foto: vk.com
Májilis depýtaty Bolat Kerimbek "Bolashaq" baǵdarlamasy máselelerin kóterdi. Ol baǵdarlamanyń quqyqtyq mártebesin bekitýdi usynyp, premer-ministriniń orynbasary Tamara Dúisenovaǵa saýal joldady, dep habarlaidy "Ult Aqparat".
Depýtatty «Baǵdarlamany jabý kerek!» degen syńaida usynystar alańdatyp otyr. Onyń pikirinshe, bir-eki adamnyń jaǵymsyz áreketinen, myńdaǵan adamnyń jolyn ashqan biregei memlekettik baǵdarlamany jabý degen durys emes.
"Osy kúnge deiin Bolashaq baǵdarlamasy boiynsha 12 myńnan astam maman daiarlanǵan. Olar reitingi joǵary oqý oryndarynyń ǵylymi dárejesin aldy, álemniń jetekshi kompaniialary men ýniversitetterinde ǵylymi jáne óndiristik taǵylymdamalardan ótti, ótip te jatyr. Baǵdarlamanyń arqasynda qarjylai múmkinshiligi shekteýli aýyl jastaryna, memlekettik qyzmetshilerge, ǵylymi jáne pedagogikalyq qyzmetkerlerge álemniń eń myqty ýniversitetterinde bilim alýǵa zor múmkindik berildi. Osydan otyz jyl buryn bastaý alǵan joba «memleketti bilikti kadrlarmen qamtý turǵysynan asa qajet» - desem, qatelespeimin.
Búginde Bolashaq túlekteri Prezident apparatynan bastap, barlyq mańyzdy mekemeler men ulttyq kompaniialarda qyzmet etip júr. Jalpy alǵanda respýblikanyń sapaly menedjmentin qurap otyr", - deidi Bolat Kerimbek.
Ol osy baǵdarlama boiynsha oqyp kelgen, taǵylymdamadan ótken túlekter ár túrli salada eńbek etip jatqanyn tilge tiek etti. Olardyń qatarynda «Bolashaq» baǵdarlamasynyń túlegi, neirohirýrg Myńjylqy Berdiqojaev bar. Qazirde ol midyń tamyrlaryna joǵary tehnologiialyq ota jasaityn sanaýly dárigerdiń biri. Ol osy ýaqytqa deiin 6000-nan astam ota jasady.
"Sonymen qatar Medet Mahanbet 70-ten astam biregei ýnikaldy operatsiiany jańa ádispen qulaq qalqanyn qalpyna keltirgen. Bul bir ǵana meditsina salasyndaǵy oń tájiribe. Basqa salalarda da mundai jetiske jetken biliktiligi joǵary mamandar jeterlik", - dep qosty depýtat.
Joǵaryda aitylǵandardy eskere otyryp, Bolat Kerimbek Úkimetten kelesi sharalardy qolǵa alýdy usyndy:
1. Bolashaq baǵdarlamasy kóptegen Zań aiasyndaǵy aktilermen rettelgendikten, ol óz kezeginde quqyqtyq qiyndyqtar týyndatýda. Sondyqtan, Bolashaq baǵdarlamasynyń quqyqtyq mártebesin zań aiasynda Úkimet bekitýi tiis.
2. Shetelde qorǵalǵan dissertatsiialardyń elektrondy bankin jasaqtaý qajet. Bul ǵylymi jumystardyń ashyqtyǵyn qamtamasyz etedi.
3. Tiisti memlekettik organ stipendianttarǵa el ekonomikasyna qajetti taqyryp boiynsha ǵylymi jumysyn jazýǵa tapsyrys berýi qajet.
4. Oqýǵa qujat tapsyrýdy, kepildikke qoiylatyn múlikterdi tirkeýdi, tirkeýden shyǵarýdy tsifrlandyrý qajet. Bul óz kezeginde ashyqtyqty qamtamasyz etedi.
"Qoryta kele, bolashaq urpaq pen bilimdi jastar úshin asa mańyzdy baǵdarlamany jan-jaqty jetildirý men onyń mańyzdylyǵyn arttyrý maqsatynda aqparattyq-nasihattaý jumystaryn keńinen júrgizý kerek.
Bilimge qushtar jastardyń múmkindigine qol suǵý – ol bolashaqqa balta shabýmen teń!", - dep túiindedi depýtat.
