Foto: Májilistiń baspasóz qyzmeti
Májilis depýtaty Abzal Quspan Bas prokýrorǵa Altai Kólginov Oral qalasynyń ákimi bolyp turǵan kezde qol qoiǵan qaýly jóninde saýal joldady, dep habarlaidy Kazinform agenttigi.
«Ákimniń qaýlysyna sáikes, qala turǵyndaryna baǵbandyqpen ainalysý úshin „Venera“ baǵbandyq seriktestigi arqyly jer ýchaskeleri zańsyz berilgen. Zańsyzdyǵy sol, atalǵan jer ýchaskeleri Jaiyq ózeniniń rekreatsiialyq sý qorǵaý aimaǵyna jatady, qalyń aǵash ósip tur, soǵan qaramastan ol jerler Jaiyq-Kaspii bassein inspektsiiasynyń kelisiminsiz berilgen. Nátijesinde qoldanystaǵy Jer kodeksi, Sý kodeksi, Ekologiia kodeksi men jer kezeginde turǵan 200 myńǵa jýyq oraldyqtyń konstitýtsiialyq quqyqtary buzylǵan», — deidi depýtat.
Onyń málimetinshe, qala ákiminiń ókili sotta zańbuzýshylyqpen tolyq keliskenimen, jer berilgenine 3 jyldan astam ýaqyt ótip ketkenin alǵa tartyp, ýákiletti organnyń talap aryzyn qanaǵattandyrýdan bas tartýdy suraǵan.
Prokýratýra ókili de qalalyq ákimshilikti qoldap qorytyndy bergen. Sýdia da olarmen kelisip, talap aryzdy qanaǵattandyrýsyz qaldyrady.
Oral qalasynyń sol kezdegi ákimi Altai Kólginov qol qoiǵan qaýly boiynsha, zańsyz jer ýchaskesin alǵan jer ieleriniń aldaǵy kóktemde Jaiyq jaǵasyndaǵy aǵashtardy qyrqyp, tabiǵatqa ólsheýsiz ziian keltire otyryp, qurylys jumystaryn bastaýyna keńinen jol ashyldy.
«Sebebi qolynda Joǵarǵy sottyń sheshimi bar. Ol, óz kezeginde, qala turǵyndary men tabiǵat janashyrlarynyń ashý-yzasyn týdyratyny túsinikti, alaida jer ieleriniń qurylys júrgizýine endigi jerde eshkim tosqaýyl qoia almaidy. Sonymen qatar osy ispen ainalysý barysynda qolyma „Venera“ baǵbandyq seriktestiginiń aryzy boiynsha jergilikti Antikor tarapynan júrgizilgen tergeý materialdary tústi. Oǵan sáikes, 2019 jyldan bastap osy fakt boiynsha tirkelgen qylmystyq is eki ret qysqartylǵan», — deidi Abzal Quspan.
Depýtat jerdi múddeli adamdarǵa rásimdeýdiń quityrqy shemasy bolǵanyn aitady.
«Mine, meniń qolymda atalǵan seriktestik basshysy 2019 jyldyń 13 mamyrynda qolyn qoiyp, mórin basqan aryz. Oǵan sáikes, Jaiyq ózeni boiyndaǵy jerler áý basta jergilikti ákimdik, jerge ornalastyrý jónindegi memlekettik jobalaý institýty men prokýratýra qyzmetkerleri usynǵan tizim boiynsha óz kisileriniń, oryssha aitqanda „podstavnoi“ adamdar atyna rásimdelip, keiin basqa adamdarǵa aýystyrylǵan. Bul faktiler tergeý barysynda anyqtalsa da, qylmystyq is búgingi kúni toqtap tur. Eń qyzyǵy, dál osy qylmystyq is tergelip jatqan tusta, 2022 jyldyń 30 jeltoqsanynda, iaǵni jańajyldyq qarbalasty paidalanyp áldekimder jerge ornalastyrý jónindegi memlekettik jobalaý institýtynyń arhivine qasaqana órt qoiǵan, sonyń saldarynan jer kadastrynyń málimetter bazasy ornalasqan server janyp ketken. Qazirgi tańda bul qylmystyq is te kúdiktiniń tabylmaýyna bailanysty toqtatylǵan», — deidi ol.
Saýal iesi quzyrly organ basshysynan Joǵarǵy sottyń osy kúmándi sheshimine taldaý júrgizý kerek dep esepteidi.
«Qurmetti Berik Noǵaiuly, sizden BQO-daǵy áleýmettik shielenisterdiń aldyn alý maqsatynda Joǵarǵy sottyń azamattyq ister boiynsha qalyptasqan sot tájiribesine taldaý júrgizip, prokýrorlyq yqpal etý sharalaryn qoldanýdy suraimyn», — dedi Abzal Quspan.
