QR Parlamenti Májilisiniń depýtaty Ermurat Bapi Qazaqstan Respýblikasynyń Premer-ministri Oljas Bektenovke, QR Qarjylyq monitoring agenttiginiń tóraǵasy Janat Elimanovqa, QR Ulttyq banktiń tóraǵasy Timýr Súleimenovke jazbasha depýtattyq saýal joldap, ekonomikanyń basqa salasy túgili, eldegi oiyn biznesiniń ózin reseilik oligarhtar jaýlap ala bastaǵany jóninde dabyl qaqty.
Atalǵan saýalda, Parlament Májilisiniń ótken jyly qoldanystaǵy «Oiyn biznesi týraly» zań normalaryna ózgerister men túzetýler qabyldaǵany jáne ol oiyn biznesiniń naryqpen, salyq tártibimen jáne qoǵammen qarym-qatynasyn retteýdiń jap-jaqsy normalary bolǵandyǵy jazylǵan.
Biraq arada bir jyl ótkende, osy zańnyń oryndalý jáne qoldanylý barysyn saraptai kelgende, atqarýshy organdar tarapynan zań talaptaryn múddeli toptardyń yqpalyna qarai burmalaý derekteri aiqyndaldy. Bir sózben aitqanda, el Prezidenti qol qoiǵan osy zańnyń astarynda jasalǵan aktiler arqyly monopoliiaǵa qarsy talaptardy buzý derekteri anyqtalýda.
«Ókinishke qarai, Prezidenttiń birneshe ret bergen tapsyrmalaryna qaramastan, Úkimet jańa monopoliialyq qurylymdar qurýdy jalǵastyrýda. Bul biznes pen qoǵamnyń júrgizilip jatqan reformalarǵa degen senimine nuqsan keltirýde. Osy depýtattyq saýalǵa túrtki bolǵan oiyn biznesi salasyndaǵy Biryńǵai esep júiesi (BEJ) monopoliialyq ústemdiktiń naqty mysaly bola alady. Bastapqyda qumar oiynǵa táýeldilikpen kúresý úshin qurylǵan BEJ búginde «ROP operatory» siiaqty jeke menshik sýbektiniń múddesin kúitteitin prokladkaǵa ainalyp ketken. Sonyń saldarynan osy sektordaǵy zańdy qazaqstandyq biznesten túsetin 110 mlrd teńgege jýyq salyqtyń jáne sportqa demeýshilikke jumsalatyn 14 mlrd teńge shamasyndaǵy túsimniń edáýir qysqarýyna áser etýde», - dep kórsetilgen saýalda.
Depýtattyń málimetinshe, memleket atynan BEJ-i fýnktsiialaryn júrgizý úshin qurylǵan «NomaPay» (NomaPei) jaýapkershiligi shekteýli seriktestigi Úkimet bergen ókilettikterdi paidalaný arqyly barlyq monopoliialyq tetikterdi iemdenip alyp, búginde ol Reseidiń múddesine jumys isteýde. Bul seriktestiktiń túpkilikti benefitsiary reseilik fýnktsioner Ýmar Kremlev.
Al byltyr zań jobasyn talqylaý barysynda depýtattar bul BEJ júiesin qajetsiz deldal dep sanaǵan edi. Alaida nege ekeni belgisiz, osy júiege býkmekerlik keńselerdiń qyzmetin baqylaý úshin qosymsha ókilettikter berildi. Sonyń saldarynan Ýmar Kremlev baqylaityn «NomaPei» kompaniiasy qazaqstandyq oiyn biznesi naryǵyn monopoliialaý qaýpin týdyryp otyr. Buǵan qosa, sarapshylardyń baǵalaýy boiynsha, BEJ jylyna shamamen 3,9 trln teńgeni quraityn stavkalardyń úlken kóleminen komissiia alatyn boldy. Bul somanyń basym bóligi qolma-qol aqsha qarajatyn quraidy.
Endi qarańyz, Ýmar Kremlevtiń separatist dep tanylyp otyrǵan «Severnyi kazahqa» qoldaý bildirip kelgeni anyqtalyp otyr. Bul týraly reseilik «Rýsskaia obshina» skinhedter uiymynyń podkastynda ashyq aityldy. Podkastta «Rýsskaia obshina» uiymynyń liderleriniń biri Roman 7.62 «áleýmettik jelide «Severnyi kazah» degen laqap atpen tanylǵan bloger Aslan Tólegenovti ózderiniń jiyndaryna shaqyrǵandaryn jáne Aslanǵa Ýmar Nazaruly Kremlev emdelýge dep mol aqsha bergendigin» jasyrmai aitady. Ol áńgime suhbattyń 20-shy minýty.
Biyl tamyz aiynda Ýmar Kremlev qoldap júrgen Aslan Tólegenov Qylmystyq kodeksiniń 174-baby – «ulttyq, áleýmettik, rýlyq, násildik nemese dini arazdyqty qozdyrý» baby boiynsha ustalǵan bolatyn. Al artynan oǵan bólek is qozǵalyp, Aslan Tólegenovtiń isi Ulttyq qaýipsizdik qyzmetiniń tergeýine ótken. Endi quzyrly organdarǵa Ýmar Kremlevtiń Aslan Tólegenovke qandai maqsatpen iri kólemde aqsha berip júrgenin de anyqtaý qajet. Sebebi, memleketimizdiń qaýipsizdigine qaýip tóne bastaǵany anyq baiqalady.
