Májilis depýtaty Erlan Smailov Almaty qalasyndaǵy halyqaralyq áýejaiǵa Dinmuhamed Qonaevtyń atyn berip, iri qalalarda yǵy-jyǵy qurylys salýǵa tyiym salýdy usyndy, dep habarlaidy QazAqparat.
«Úkimetke eldiń Nur-Sultan, Almaty siiaqty iri qalalarynda yǵy-jyǵy qurylystarǵa zańnama deńgeiinde tyiym salý qajet. Ahýal shekten shyǵyp barady, jergilikti ákimdikter jaǵdaidy igere almai otyr. Kei jaǵdaida óz áreketimen ahýaldy ýshyqtyrýda. Ákimdikter men qurylysshylardyń sheshimdi ylǵi kýlýarda sheshýi qala turǵyndarynyń ádiletti narazylyǵyn týǵyzyp, ózderin jaisyz sezinýge sebepker boldy. Prezidenttiń tapsyrmasyna qaramastan, Almatyda bul másele sheshilip jatqan joq. Almaty qalasy ákimdiginiń qazirgi quramyna aldyńǵylardan qolaisyz jobalar qalǵan. Úkimet deńgeiinde júieli sheshim qajet. Shyn máninde bul - aisbergtiń sý betindegi kórinisi ǵana», - dedi depýtat Premer-Ministrdiń birinshi orynbasary Roman Skliardyń atyna joldaǵan saýalynda.
Aitýynsha, sáýlet-qurylys salasyna birqatar túitkildi máselelerdiń jiyntyǵy boiynsha tártip ornatý qajet.
«Ákimdikterdiń sáýlet-qurylys salasyna qatysty sheshimderi ashyq shyǵarylmaidy. Sheshim shyǵarý kezinde qala turǵyndarynyń, sáýletshiler men ýrbanisterdiń pikiri eskerilmeidi. Kólik, áleýmettik infraqurylym qajettigin eskerýsiz sheshim qabyldanady. Qurylys kompaniialarynyń jergilikti atqarýshy organdardy manipýliatsiialaýynyń saldarynan qalalyq orta men jasyl aimaqtar degradatsiialanyp, qalalardyń qurylysy júiesiz júrip, «adam ileýleri» paida bolyp jatyr. Jalpy qalalyqtardyń ómir sapasy nasharlady. Osylaisha qurylys kompaniialary tabysqa kenelip, turǵyndar men ákimdikter problemalarǵa tap kelip jatyr. Makrodeńgeide bul jaǵdai qalalardyń teńgerimmen damýyna jáne ulttyń ekonomikalyq, kreativti ósý ortalyǵyna ainalýyna kedergi keltiredi», - dedi ol.
Depýtattyń paiymynsha, bul jaǵdai «halyq únine qulaq asatyn memleket» tujyrymyna túbirimen qaishy.
«Sondai-aq, Almaty turǵyndarynyń bastamasyn qoldai otyryp, Memleket basshysynyń Qapshaǵai qalasynyń ataýyn ózgertý bastamasynyń jalǵasy retinde Úkimetke Almaty qalasyndaǵy halyqaralyq áýejaiǵa Dinmuhamed Qonaevtyń atyn berýdi usynamyz», - dedi depýtat.
