Májilis depýtaty Aidos Sarym jańa zań qabyldanǵannan keiin Qazaqstanda áleýmettik jeliler buǵattalýy múmkin degen aqparatqa qatysty pikir bildirdi, - dep habarlaidy Tengrinews.kz tilshisi.
Jýrnalisterdiń suraqtaryna jaýap bergen Aidos Sarym azamattardyń pikiri tolyq eskerilgenin aitty.
"Mundai norma bar degen sóz ol qoldanylady degendi bildirmeidi. Áńgime kiberbýlling, Qazaqstan zańnamasyn qasaqana buzý jáne áleýmettik jelilerdiń talaptary boiynsha qalypty mehanizmdi jolǵa qoiý týraly bolyp otyr. Bizde mundai norma bar degen áńgime "jaýyz memleket" degendi bildirmeidi. Erteń birinen soń birin iske qosady (buǵattaý. - eskert.) degendi de bildirmeidi. Bul - azamattyq qoǵamda bar alarmizm men senimsizdik", - dedi Sarym.
Májilismenniń pikirinshe, kásibi mediaqoǵamdastyq ókilderi buǵattalýy múmkin degen aqparatty aitady. Onyń aitýynsha, "kez kelgen bastamany, ol qandai baǵytta bolsa da, alańdaýshylyqpen qabyldaidy".
"10-12 jyl buryn zańnama telekompaniialar filialdaryn tirkeýdi ózgertti. Sol kezde de osyndai boldy. Sol uiymdar: "bul zań qabyldansa, qazaqstandyqtarǵa telearnalar qoljetimdi bolmaidy" dep aiqailady. Eshkim eshteńe joǵaltqan joq, barlyǵy qarap otyr", - dedi Sarym.
Depýtat azamattarǵa ýaiymdaýdyń qajeti joq ekenin aitty. Norma zańǵa baǵynatyn azamattarǵa, blogerler men qoldanýshylarǵa qatysty bolmaidy.
"Endi osy máselelerdiń barlyǵyna jaýap beretin ýákiletti organ - Aqparat jáne qoǵamdyq damý ministrligin jasadyq. Esterińizde bolsa, buryn qandai da bir sait óship qalsa, "Qazaqtelekom", UQK nemese basqa bireý ainalysa ma belgisiz edi. Endi olai bolmaidy", - dep túiindedi Sarym.
