"Aq jol" fraktsiiasynyń depýtattary 1945 jyldyń 9 mamyryna deiin týǵan jáne tylda eńbek etken azamattardyń zeinetaqysyn kóterýdi usyndy, dep habarlaidy Sputnik Qazaqstan.
Depýtat Erlik Ómirǵalidiń aitýynsha, II Dúniejúzilik soǵys kezinde tyl eńbekkerleri júzdegen zaýyt salyp, milliondaǵan tonna astyqty maidanǵa jiberdi. Al Qazaqstanda óndirilgen mys, qorǵasyn, volfram men molibdendi soǵys tehnikasyn jasaý úshin paidalandy. Er adamdardyń kóbi maidanǵa attandy. Tylda áielder men balalar qaldy.
"Sol kezdegi jasóspirimder qazir 90 jasqa keldi. Soǵys balalarynyń taǵdyry qiyn boldy. Ákeleri soǵysqa attansa, analary kúni boiy zaýyt pen kolhozda eńbek etti. Olar balalyq shaqtan aiyryldy. Ashtyq pen joqtyqty kórdi. Artynan dál osy balalar eldi kóterýge atsalysty. Osy urpaq KSRO ydyraǵanda Táýelsizdikti alýǵa sheshim qabyldady", - deidi Ómirǵali.
Osy oraida májilismen "Soǵys balalary" mártebesin bekitý máselesin kóterdi. Máselen, Ýkrainada ondai zań bar. Al soǵys jyldary týǵan adamdardyń zeinetaqysyna qosymsha aqsha tólenedi. Reseidiń keibir aimaqtarynda týra sondai sharalar qolǵa alyndy.
"Osyǵan bailanysty "Aq jol" fraktsiiasy "Soǵys balalary" mártebesin zańdy túrde bekitip, Qazaqstanda 1945 jyldyń 9 mamyryna deiin týǵan jáne turyp jatqan adamdardyń zeinetaqysyna ústemeaqy qosyp berýdi usynady", - dep atap kórsetti Ómirǵali.
Depýtat jyl saiyn soǵys ardagerleriniń azaiyp kele jatqanyn da eske saldy. On jyl buryn olardyń sany kóp bolsa, qazir nebári 665 ardager ǵana qaldy. Demek, memlekettiń qarjylai shyǵyndary da azaiyp keledi. Alaida batyrlar azaiyp jatyr dep, aqshany únemdeýge bolmaidy. Sonyń esebinen "Soǵys balalaryna" qoldaý jasaǵan durys.
Aita keteiik, postkeńestik elderde II Dúniejúzilik soǵys kezinde týǵan nemese soǵys aiaqtalǵanda 18 jasqa tolmaǵan adamdardy "soǵys balalary" dep ataidy. Ulttyq statistika biýrosynyń málimetterine sáikes, ótken jyly Qazaqstanda osy sanatqa jatatyn 472 myń adam bolǵan.
