Parlament májilisiniń depýtaty Gúljan Qaraǵusova bilim, densaýlyq saqtaý jáne áleýmettik salalardaǵy qyzmetkerlerdiń jalaqysyn ulǵaitý jóninde sharalar qabyldaýdy talap etti, dep habarlaidy Sputnik Qazaqstan tilshisi.
Qaraǵusova premer-ministrdiń atyna joldaǵan depýtattyq saýalynda 2016 jyldan bastap elimizde respýblikalyq jáne jergilikti biýdjet esebinen qarjylandyrylatyn uiymdardyń qyzmetkerlerine jalaqy tóleýdiń jańa júiesi engizilgenin atap ótti. Jańa júiege kóshý arqyly densaýlyq saqtaý qyzmetkerleriniń jalaqysyn 28%-ǵa, bilim jáne ǵylym qyzmetkerleriniń jalaqysyn 29%-ǵa deiin kóterý josparlanǵan.
Degenmen 2016 jyly bilim qyzmetkerleriniń jalaqysy odan aldyńǵy jylmen salystyrǵanda 6,4%-ǵa, al áleýmettik qyzmetter jáne densaýlyq saqtaý qyzmetkerleriniki bar-joǵy 0,7%-ǵa kóterilgen. 2017 jyly bilim qyzmetkerleriniń naqty ortasha jalaqysy 4,4%-ǵa, al áleýmettik qyzmetter jáne densaýlyq saqtaý qyzmetkerleriniki 4,3%-ǵa azaiǵan.
"Iaǵni is júzinde bilim, densaýlyq saqtaý jáne áleýmettik salalardaǵy qyzmetkerlerdiń jalaqysy kóbeiýdiń ornyna azaiǵan bolyp tur", — dep jazylǵan depýtattyq saýalda.
Qaraǵusova elordadaǵy 18 jastan asqan múgedektermen jumys isteitin "Nurly júrek" áleýmettik qyzmet kórsetý ortalyǵy qyzmetkerleriniń jalaqysyn mysalǵa keltirdi. Bul uiymda sanitar qolyna 30 924 teńge, tárbieshiniń kómekshisi 28 247 teńge, as úi jumysshysy 27 390 teńge alady eken. Ózge óńirlerde de jaǵdai máz emes, áleýmettik qyzmetkerler 26 myńnan 40 myń teńgege deiin alatynyn atap ótti depýtat.
"Kommýnaldyq tólemderdiń ózi ortasha 15-20 myń teńge bolyp jatqanda mundai jalaqyǵa qalai ómir súrýge bolady? Oǵan qosa azyq-túlik satyp alý qajet, jolaqysy bar, balańdy balabaqshaǵa berýiń kerek. Qyzmetkerlerdiń kóbisiniń basynda baspana joq, aiadai ǵana bólmeni jaldap otyr", — dep qynjyldy Qaraǵusova.
Depýtat mundai jalaqymen qyzmetkerlerdiń kóbisi memlekettik turǵyn úi baǵdarlamasyna da qatysa almaitynyn ashyna aitty.
Onyń sózine qaraǵanda, azamattyq qyzmetkerler jalaqysynyń osynshalyq az bolýyna laýazymdyq jalaqyny esepteý kezinde qoldanylatyn bazalyq laýazymdyq jalaqy deńgeiiniń tómendigi basty sebepterdiń biri bolyp otyr. 17 697 teńge kólemindegi bazalyq laýazymdyq jalaqy 2011 jyly bekitilgen. Bul eń tómengi kúnkóris deńgeiinen 40%-dai az jáne jeti jyl boiy ózgermegen.
Osyǵan bailanysty Qaraǵusova bazalyq laýazymdyq jalaqyny zańmen bekitilgen ailyq jalaqynyń eń tómengi kólemimen almastyrýdy usyndy.
