Foto: Samuryq
Májilis depýtaty Gúldara Nurymova V-shi Dúniejúzilik kóshpendiler oiynyna deiin "Toǵyzqumalaq" oiynynyń ataýyn Túrki halyqtaryna ortaq nusqamen «Toǵyzat» dep aýystyrýdy usyndy, dep habarlaidy "Ult Aqparat".
"Toǵyzqumalaq ziiatkerlik oiyny túrki halyqtarynyń ortaq igiligi, tarihi qundylyǵy men aqyl-oi mádenietiniń kórsetkishi ári ortaq jádigeri bolyp tabylady. Bul oiyn sońǵy jyldary damýdyń barynsha joǵary satysyna kóterilgenmen, álemdik aýqymda barynsha ornyǵýǵa keibir kedergiler bar. Sonyń biri – toǵyzqumalaq sportynyń ataýy.
Búginde bul oiyndy negizinen qazaq jáne qyrǵyz halyqtary básekelese damytyp otyrǵanyna orai, oiynnyń negizgi eki ataýy ornyǵyp otyr: qazaqsha – toǵyzqumalaq, qyrǵyzsha – toǵyzkórgól, ishinara túrikshe - mangala/gechiýrme atalady. Qazaqstan tarapy halyqaralyq jarys ótkizgende, oiynnyń aty «toǵyzqumalaq» atalady da, Qyrǵyzstan jaǵy jarys uiymdastyrǵanda, bul oiyn «toǵyzkórgól» bolyp shyǵa keledi. Osylaisha, túrki halyqtarynyń bir oiyny álemdik arenada eki túrli atalyp keledi.
Ǵalymdar men zertteýshilerdiń pikiri boiynsha, bul oiynnyń jalpytúrkilik ataýy bar, ol – Toǵyzat. Bul týraly etnograf G.Zagriajskiidiń jasaǵan eńbegi arqyly oiynnyń ataýy XIX-ǵasyrda «Toǵyzat» atalǵany málim bolyp otyr. Osylaisha, toǵyzqumalaqtyń burynǵy ataýy «Toǵyzat» ekendigin bildiretin Qaraqalpaq jáne Qyrǵyz elderinniń oiyndarynyń ataýyna kezdestirýge bolady. Osy derekterdi eskere otyryp, aldaǵy V-shi Dúniejúzilik kóshpendiler oiynyna deiin jalpytúrkilik bul ziiatkerlik sporttyń ataýyn ortaq nusqamen «Toǵyzat» ataýyn qalyptastyrý sharalaryn qolǵa alýdy usynamyz", -deidi depýtat.
Gúldara Nurymova Búkilálemdik etnosport konfederatsiiasy, QR Ulttyq sport qaýymdastyǵynyń, Dúniejúzilik Toǵyzqumalaq federatsiiasynyń qatysýymen birikken sheshim qabyldaǵan durys bolatynyn aityp otyr.
Ol óziniń depýtattyq saýalyn Týrizm jáne sport ministri E.B. Marjyqpaevqa joldady.
