Qazaqstannyń depozitterge kepildik berý qory 2020 jylǵy qańtarda teńgedegi depozitteri boiynsha usynylatyn eń joǵary syiaqy mólsherlemelerin jariialady.
«Tolyqtyrylmaityn jinaq salymdary boiynsha eń joǵary mólsherlemeler jylyna 14,1%, 2 jylǵa – 14,5% quraidy. Bul qazaqstandyqtar arasynda eń talap etiletin jinaq salymdary: olarǵa qaldyqtaǵy kólemniń 83% keledi. Jyl basynan beri teńgedegi salymdardyń barlyq túrleri boiynsha búkil ósim 429 mlrd teńgeni qurady, onyń ishinde 237 mlrd jinaq salymdaryna keldi. Basqasha aitqanda, árbir ekinshi teńge jinaq salymdaryna ornalastyryldy, nátijesinde olardyń kólemi 10 ese ulǵaidy», - dep habarlaidy Qazaqstannyń depozitterge kepildik berý qory.
3 jáne 6 aiǵa merzimsiz jáne merzimdi depozitter boiynsha eń joǵary syiaqy mólsherlemeleri burynǵy deńgeide saqtaldy, sebebi olardy esepteý úshin Qazaqstan Ulttyq banki sheshim qabyldaityn bazalyq mólsherlemesi negiz bolyp tabylady. Aǵymdaǵy sátte ol 9,25% -ǵa teń.
Eń joǵary syiaqy mólsherlemeleriniń ósýin 12 ai merzimindegi merzimdi salymdar anyq kórsetedi: bankter 11,1% mólsherlemesimen tolyqtyrylatyn, al 11,6 % mólsherlemesimen tolyqtyrylmaityn merzimdi depozitterdi qabyldai alady. 24 aiǵa merzimdi salymdar boiynsha eń joǵary mólsherlemeler 0,1 paiyz kóleminde shamaly tómendedi.
2018 jyldyń qazan aiynan bastap Qazaqstanda depozitterdiń jańa jiktemesi - jinaq, merzimdi jáne merzimdi emes depozitter jumys istei bastady.
Merzimsiz salym – bul eń daǵdyly depozit: bank salymy shartynyń áreket etý merzimi salymshynyń syiaqylardy joǵaltpastan aqshany kez kelgen ýaqytta paidalanýyn shektemeidi.
2019 jylǵy qyrkúiekten bastap merzimsiz salymdar boiynsha usynylatyn eń joǵary syiaqy mólsherlemesi Qazaqstan Ulttyq bankiniń bazalyq mólsherlemesi negizinde esepteledi.
Bir jyldan asa merzimdi jáne jinaq salymdary boiynsha usynylatyn eń joǵary syiaqy mólsherlemeleri básekelestik naryqta qalyptasqan syiaqy mólsherlemeleri negizinde esepteledi, sondyqtan osy salymdar boiynsha tabystylyq – joǵary.
QDKBQ kepildigi teńgedegi merzimsiz jáne merzimdi salymdar boiynsha 10 million teńge, jinaq salymdary boiynsha – 15 million teńge quraidy. Eger salymdar ár túrli bankterde ornalastyrylsa, QDKBQ árbir bankte ornalastyrylǵan depozitterge jeke-jeke kepildik beredi.
