Densaýlyq salasyndaǵy zańmen tyiym salynbaǵan aqparattyń barlyǵy qoljetimdi bolýy tiis. Bul týraly Ulttyq qoǵamdyq senim keńesiniń múshesi, Eýropalyq quqyq jáne adam quqyqtary institýtynyń direktory Marat Báshimov aitty, dep habarlaidy QazAqparat.
«Aqparatqa qoljetimdilik týraly zań qabyldanǵan. Atalǵan zańnyń negizgi maqsaty zańmen tyiym salynbaǵan aqparattardyń barlyǵyna ruqsat berilýi tiis», - dedi ol «Densaýlyq saqtaý salasynyń ashyqtyǵy: Jańa trendter aqparatqa qoljetimdilikke qalai yqpal etedi» degen taqyryptaǵy onlain pikirtalas barysynda.
Osyǵan orai Ulttyq keńes múshesi bul máselelerdiń barlyǵyn meditsina qyzmetkerlerimen, olardyń basshylarymen jan-jaqty talqylaý qajet degen oiyn bildiredi.
«Óitkeni, bul dárilik preparattarǵa, meditsinanyń qoljetimdiligine, salamatty ómir saltyna jáne meditsinada barynsha ózekti sanalatyn barlyq blokqa qatysty jaittar. Belgili bir preparttarǵa qatysty qolymyzda nege aqparat joq? Aitalyq, men táýekel tobyna kiremin. Qan qysymym joǵary bolǵandyqtan dári ishemin. Jazyp bergen dárisin ishkennen keiin infarkt alyp qala jazdadym. Al odan keiin atalǵan dáriniń áli probatsiia satysynda ekendigin bildim. Buǵan qalai jol berilgen. Muny bilgende esten tandym. Sodan keiin buryn qabylap júrgen dárime qaita kóshtim», - dedi Marat Báshimov.
