QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda elimizdegi epidemiologiialyq ahýal qaraldy.
Densaýlyq saqtaý ministri Aleksei Tsoi ýaqytyly qabyldanǵan sharalardyń arqasynda koronavirýsqa qatysty jaǵdai turaqtanǵanyn baiandady. Koronavirýs infektsiiasy men virýstyq pnevmoniianyń táýliktik ósýi 0,5% sheginde. Búgingi tańda osy infektsiiany juqtyrǵan adamdardyń 94%-y emdelip shyqty, infektsiialyq aýrýhanalardyń júktemelenýi 15% qurap otyr. Koronavirýs infektsiiasyna bailanysty jedel járdem shaqyrý 80% deiin tómendedi.
Aýrýhanadaǵy oryndar sanyn 50 myńǵa deiin arttyrý máselesi pysyqtalýda. Óńirlerde 12 juqpaly aýrýlar aýrýhanasy salynyp jatyr, 2 statsionar qaita jóndelýde.
Aýyldyq jerlerdegi meditsinalyq kómektiń qoljetimdiligin qamtamasyz etý jumystary júrgizilýde. Jedel járdem avtokólikterimen, avtobýstarmen jáne barlyq qajetti jabdyqtarmen (ókpeni jasandy jeldetý apparattary, ottegi kontsentratorlary) qamtamasyz etilýde.
Aýdandyq aýrýhanalarda 132 rentgen apparaty ornatyldy. Biyl 1 qazanǵa deiin qosymsha 100 jyljymaly meditsinalyq keshen satyp alynady.
Elimizde jeke qorǵanysh quraldary men dári-dármekterdiń jetkilikti qory jasaldy, tapshylyq bolmaidy. Onyń ústine, tamyz aiynan beri aýrýhanalarda virýstyq infektsiiadan emdelý úshin halyqqa tegin dári-dármek (ystyqty túsiretin, antikoagýlianttar) berilip jatyr.
PTR testileý múmkindigi artty (táýligine 40 myńǵa deiin, 63 myńǵa deiin jetkizilýi múmkin). Vaktsina satyp alý jáne ózimizde vaktsina jasap shyǵarý jóninde kelissózder ótkizildi. 15 qyrkúiekten bastap turǵyndarǵa tumaýǵa qarsy ekpe jasalady.
«Jalpy, Úkimet tarapynan aýqymdy júieli jumys júrgizilýde. Qabyldanǵan sharalardyń nátijesinde biz elimiz úshin kúrdeli kezeńdi eńserdik jáne aýrýdyń taralý deńgeiin tómendetý qamtamasyz etildi. Bastysy, bizdegi densaýlyq saqtaý júiesi koronavirýs juqtyrǵandardy emdeý boiynsha zor tájiribe aldy. Barlyq qabyldanyp jatqan sharalar kúzde paida bolýy múmkin pandemiianyń jańa tolqynyna jáne maýsymdyq aýrýlarǵa qarsy kúresýge jaǵdai jasaidy. Árine, sanitarlyq talaptardy qatań saqtaý kerek», — dedi Mamin.
Úkimet basshysy álemdegi epidemiianyń turaqsyzdyǵyn eskerip, virýstyń qaitadan órshý múmkindigine daiyndyq jumystaryn jalǵastyrý jáne keibir shekteý sharalaryn (qashyqtan bilim berý, demalys kúnderi lokdaýndy saqtaý) saqtaý qajet ekenin atap ótti.
Premer-Ministr óńirlerdiń ákimderine epidemiologiialyq jaǵdaidy erekshe baqylaýda ustap, barlyq sanitarlyq normalardy qatań saqtaýdy, virýstyń taralýy men aýrý juqtyrý kórsetkishteriniń ózgerýine qarai jedel ári naqty áreket etýdi, infraqurylymdy daiyndaý sharalaryn qabyldap, barlyq satydaǵy meditsina qyzmetkerleriniń qaýipsizdigin qamtamasyz etýdi tapsyrdy.
Densaýlyq saqtaý ministrligine múddeli memlekettik organdarmen birge halyq arasynda profilaktikalyq jumysty kúsheitý tapsyryldy.
«Densaýlyq saqtaý júiesiniń daiyndyǵyn baqylaýda ustaý qajet, sondai-aq qaýip tobyndaǵy adamdardy naqty qadaǵalaýdy qamtamasyz etý kerek», — dedi Mamin.
